राशिवडे बुद्रुक : परिते-कुरूकली (ता. करवीर) दरम्यान काल रात्री दहाच्या सुमारास वाघाने दर्शन दिल्याने या परिसरात घबराटीचे वातावरण पसरले आहे. एका पिग्मी एजंटला कोल्हापुर-राधानगरी राज्य मार्ग पार करून गेलेला वाघ आढळला. तो पट्टेरी वाघ, बिबट्या की तरस या बाबत अद्याप संभ्रम असून वनखाते तपासणी करणार आहे.

याबाबत माहिती अशी, काल रात्री दहाच्या सुमारास भोगावती येथील गजानन महाराज पतसंस्थेचे पिग्मी एजंट शिवाजी टिपुगडे हे कुरुकली कडून पिग्मी घेऊन गावाकडे येत होते. याच वेळी परिते येथील पाटबंधारे कार्यालयाच्या परिसरात असलेल्या दौलत हॉटेलकडे भोगावती नदीकडून अचानक वाघाने झेप घेतली. दोन झेपेतच राज्यमार्ग पार करून तो डोंगराकडे पळाला. यामुळे घाबरलेल्या टिपुगडे यांनी गावकऱ्यांना सांगितले. याबाबत रात्री ग्रामपंचायतीने सर्व गावकऱ्यांना सतर्कतेचा इशारा दिला. आज सकाळपासून या परिसरात घबराटीचे वातावरण पसरले आहे. वन्यजीव विभागाचे पथक आल्यानंतर याबाबत शहानिशा होईल.

"मी रात्री कुरुकली येथून पिग्मी गोळा करून गावाकडे येत होतो. अचानक समोर रस्त्यावरच वाघाने झेप घेऊन रस्ता पार केला. राधानगरीकडून एक चारचाकी गाडी त्याचवेळेला आल्याने बिथरलेल्या वाघाने पळ काढला. माझ्या पाहणीनुसार तो वाघच होता."

- शिवाजी टिपूगडे