01830

आपत्ती काळात यंत्रणा सज्ज ठेवा
हरिष धार्मिक; गगनबावड्यात आढावा बैठक

सकाळ वृत्तसेवा

गगनबावडा, ता. ११ : ‘‘संभाव्‍य आपत्ती काळात प्रत्‍येकाने कर्तव्‍य समजून सहकार्य करत मदतीसाठी सदैव तत्पर राहावे. नैसर्गिक आपत्तींना यशस्वीपणे तोंड देण्यासाठी शासकीय यंत्रणा सज्ज ठेवा. जनतेच्या संरक्षणाच्या दृष्टीने आवश्यक ती खबरदारी घ्यावी,’’ असे आवाहन करवीर उपविभागीय अधिकारी हरीष धार्मिक यांनी केले. गगनबावडा तहसील कार्यालयात आयोजित नैसर्गिक आपत्‍ती व्यवस्थापन संबंधित आढावा बैठकीत ते बोलत होते.
उपविभागीय अधिकारी हरीष धार्मिक यांनी तालुक्यातील पाटबंधारे प्रकल्पांची माहिती घेतली. धरण जलाशय परिचलन सूचीनुसार पूरनियंत्रणाच्या दृष्टीने जलाशय पाणी पातळीचे नियोजन केले असल्याचे कळे पाटबंधारे विभागाचे शाखाधिकारी अजिंक्य पाटील यांनी सांगीतले. राष्ट्रीय रस्ते विकास महामंडळाने जनतेच्या सुरक्षिततेसाठी आवश्यक ती खबरदारी घ्यावी. राष्ट्रीय महामार्गावर अतिवृष्टीच्या काळात बहुतांशी रस्ते पाण्याखाली जातात. ज्याठिकाणी पुराचे पाणी येईल त्याठिकाणी बॅरिकेट्स लावावीत. पूरपस्थितीत जागोजागी प्रवासी अडकल्यास त्यांच्या राहण्याची व जेवणाची व्यवस्था करावी. औषधांचा पुरेसा साठा करून अंगणवाडी कर्मचारी, आशासेविका यांच्या योगदानातून तो वितरित करत आरोग्‍य विभागाने सतर्क राहण्‍याच्‍या सूचना देण्‍यात आल्‍या. विजेची लाईन जंगलभागातून असून विजेच्या तारा तुटणे, खांब कोसळणे असे प्रकार वारंवार घडत असल्याने महावितरणने सतर्कतेने काम करावे. पुरेशा रेशनचा साठा वितरित करावा; अशा सूचना धार्मिक यांनी देत सर्वच विभागांच्या परिस्थितीचा आढावा घेतला.
तहसीलदार बी. जे. गोरे यांनी स्वागत व प्रास्ताविक केले. अधिकाऱ्यांनी कर्तव्य व जबाबदाऱ्या पार पाडत जनतेची सोय करावी. लोकांची विश्वासार्हता निर्माण करावी, असे आवाहन त्यांनी केले. यावेळी गटविकास अधिकारी अलमास सय्यद, सहाय्यक पोलिस निरीक्षक ज्ञानदेव वाघ, उपभियंता बी. एस. मिसाळ, उपकार्यकारी अभियंता व्ही. एम. जाधव, तालुका वैद्यकीय अधिकारी डॉ. विशाल चोकाककर यांच्‍यासह विविध विभागांचे अधिकारी व कर्मचारी उपस्थित होते.