खामकरवाडीतील पुलाची दुरवस्था
धामोड : धामोड - म्हासुर्ली (ता. राधानगरी) मार्गावरील कुरणेवाडी - खामकरवाडीत लोंढा ओढ्यावरील पुलाची दुरवस्था झाली आहे. पुलाचे खांब जीर्ण झाले असून हा पूल अखेरच्या घटका मोजत आहे. येथे नव्याने पूल बांधावा, अशी मागणी प्रवासी वर्गातून होत आहे. लोंढा ओढ्यावर तीस वर्षांपूर्वी पूल बांधला. सध्या पुलाची दुरवस्था झाली आहे. पुलाचा एक खांब जीर्ण झाला असून पडण्याच्या मार्गावर आहे. पाणी अडवण्यासाठीही पूल कमकुवत आहे. पावसाळ्यात या पुलावर पाणी येते. त्यामुळे जनजीवन विस्कळीत होऊन दूध व्यवसायावर परिणाम होतो. अवजड वाहनांना हा पूल धोकादायक बनला आहे. अनेकदा येथे पूल बांधण्यासाठीचे निवेदन ग्रामस्थांनी शासनाला दिले आहे. परंतु शासनाने याकडे दुर्लक्ष केले आहे. जीविताचा धोका टाळण्यासाठी शासनाने नवीन पूल बांधावा; अशी मागणी कुरणेवाडीतील दगडू चौगुले यांनी केली.