अंतुर्ली ग्रामपंचायतीत
कृषी कर्ज मेळावा

कडगाव, ता. २३ : अंतुर्ली (ता. भुदरगड) ग्रामपंचायतीमध्ये बँक ऑफ इंडिया शाखा पाटगावच्या वतीने कृषी कर्ज मेळाव्याचे आयोजन केले होते. अध्यक्षस्थानी लोकनियुक्त सरपंच रामदास देसाई होते.
बँक ऑफ इंडिया पाटगाव शाखेचे शाखाधिकारी निखिल देशपांडे म्हणाले, ‘बँक शेतकऱ्यांना केवळ पीक कर्ज देते, इतकेच शेतकऱ्यांना माहिती आहे. याशिवाय गाय-म्हैस खरेदी, जनावरे गोठा, शेळी-मेंढी शेड बांधणे, दूध प्रक्रिया उद्योग, कडबा-कुट्टी मशीन घेणे, शेतीकामांसाठी पॉवर टिलर, ट्रॅक्टर, चारचाकी वाहन, दुचाकी खरेदी, मिरची कांडप मशीन, बचत गटांच्या महिलांना विविध छोट्या मोठ्या लघू व कुटिरोद्योगासाठी कर्ज उपलब्ध करून दिले जाते. हे कर्ज एक लाख ते दोन कोटींपर्यंतचे विविध कृषी कर्ज योग्य व्याज दरात मिळते. या कृषी कर्ज मेळाव्याच्या माध्यमातून अंतुर्लीसह सर्व गावांतील गरजू शेतकऱ्यांनी कृषी कर्जाच्या माहितीसाठी बँक ऑफ इंडियाच्या शाखेशी संपर्क साधावा..’
सरपंच रामदास देसाई यांनी गरजू व्यक्तींनी बँकेच्या या कर्ज योजनांचा लाभ घ्यावा, असे आवाहन केले. याबाबत शेतकऱ्यांना आवश्यक ते सर्व सहकार्य करू, असे सांगितले. यावेळी ग्रामपंचायत सदस्य, पोलिसपाटील, कृषी सखी, पशू सखी, आशा सेविका, अंगणवाडी सेविका, बचत गटांच्या महिला व ग्रामस्थ उपस्थित होते. जितेंद्र देसाई यांनी स्वागत केले. आनंदा कदम यांनी आभार मानले.