अडीच लाखांच्या ऐवजावर डल्ला
---
बसमध्ये जागा पडकण्यासाठी ठेवलेली बॅग पळविली
कोल्‍हापूर, ता. ११ ः कोल्हापूर-इस्लामपूर बसमध्ये जागा पडकण्यासाठी दोन लाख ५२ हजार रुपयांचा ऐवज असलेली खिडकीतून ठेवलेली बॅग चोरट्याने पळविली. मध्यवर्ती बसस्थानकात मंगळवारी (ता. ९) दुपारी साडेतीनच्या सुमारास ही घटना घडली. याची फिर्याद इस्लामपूर (ता. वाळवा, जि. सांगली) येथील अश्‍विनी सतीश खांबे यांनी काल (ता. १०) शाहूपुरी पोलिस ठाण्यात दिली. अज्ञात चोरट्याच्या विरोधात शाहूपुरी पोलिस ठाण्यात गुन्हा नोंद झाल्याचे पोलिसांकडून सांगण्यात आले.
पोलिसांनी दिलेली माहिती अशी ः फिर्यादी अश्‍विनी खांबे व भाऊ सुमीत पाटील यांनी मंगळवारी कोल्हापूर-इस्लामपूर बसमध्ये सीट पकडण्यासाठी खिडकीतून दागिने, रोख रक्कम अशी बॅग ठेवली. ती अज्ञातांनी चोरली. या बॅगमध्ये ५५ ग्रॅमचे सोन्याचे गंठण, दहा ग्रॅमचा सोन्याचा गुंज, पाच ग्रॅमचे कानातील टॉप्स, एक मोबाईल हॅण्डसेट आणि चार हजार रुपये रोख असा मुद्देमाल असल्याचे फिर्यादीने म्हटले आहे.
सुट्यांचा हंगाम असल्याने मध्यवर्ती बसस्थानक परिसरात प्रवाशांची गर्दी आहे. तेथे चोरांचा सुळसुळाट असल्याचे दिसते. येथे पोलिसांनी आणखी गस्त, बंदोबस्त वाढविण्याची गरज आहे. याबाबत महिलांच्या एका शिष्टमंडळाने पोलिस अधीक्षकांनाही याचे निवेदन दिले होते.