आजरा : मनोज जरांगे-पाटील (Manoj Jarange-Patil) हे कोल्हापूर येथे शुक्रवारी (ता. १७) छत्रपती राजर्षी शाहू महाराज यांच्या समाधीस्थळी भेट देऊन अभिवादन करण्यासाठी येत आहेत. त्यानंतर दसरा चौकात होणाऱ्या सभेला आजरा, भुदरगड, राधानगरी, चंदगड व गडहिंग्लज या पाच तालुक्यांतून एक लाख जण उपस्थित राहणार आहेत, अशी माहिती सकल मराठा समाजाचे जिल्हा समन्वयक मारुती मोरे यांनी दिली.

येथील जनता गृहतारण संस्थेमध्ये सकल मराठा समाजाच्या वतीने (Maratha Reservation) पत्रकार बैठक झाली. यावेळी त्यांनी माहिती दिली. जरांगे-पाटील यांनी २४ डिसेंबरपर्यंत राज्य सरकारला आरक्षणाबाबत डेडलाईन दिली आहे. त्या पार्श्वभूमीवर ते पश्चिम महाराष्ट्राच्या दौऱ्यावर येणार आहेत. सकल मराठा समाज शांततेच्या मार्गाने लढा देत आहे. याबाबत सरकारने योग्य तो मार्ग न काढल्यास उद्रेक व्हायला वेळ लागणार नाही.

सरकारला मराठा समाजाला आरक्षण द्यावेच लागेल. आमच्या या लढ्यात बारा बलुतेदारसह समाजातील सर्व घटक सहभागी झाले आहेत, असे त्यांनी सांगितले. बंडोपंत चव्हाण, प्रकाश देसाई, शंकरराव शिंदे, शिवाजी पाटील, शिवाजी इंजल, चंद्रकांत पारपोलकर आदी उपस्थित होते.