नियमबाह्य गणवेश घालणाऱ्या
वन कर्मचाऱ्यांवर कारवाईची मागणी
कोल्हापूर, ता. २३ : ‘नियमबाह्य गणवेश परिधान करणाऱ्या वन विभागातील काही वनरक्षक, वनपाल व वनक्षेत्रपालांवर कारवाई करावी,’ अशी मागणी महाराष्ट्र क्रांती सेनेचे अध्यक्ष उदय लाड यांनी पत्रकार परिषदेत दिली. या मागणीचे निवेदन जिल्हाधिकारी अमोल येडगे यांना दिल्याचेही त्यांनी सांगितले.
श्री. लाड म्हणाले, ‘वन विभागातील कर्मचाऱ्यांसाठी वन विभागाच्या नियमावलीनुसार गणवेश परिधान करणे आवश्यक आहे, तरीही काही जण पोलिस खात्याप्रमाणे खांद्यावर स्टार, टोप्यांवर बॅरेट चॅप लावून नेमप्लेटच्या रंगात फेरफार करतात, त्यातून वनविभागाच्या शिस्तीचा भंग होत असून, कोल्हापूर, सांगली, सातारा, रत्नागिरी, सिंधुदुर्ग जिल्ह्यांत काही कर्मचारी वन विभागाच्या नियमाविरुद्ध वर्तन करत असल्याचे दिसून येत आहे. महाराष्ट्र नागरी सेवा (शिस्त व अपिल) नियम १९७९ व १९९१ चे उल्लंघन होत आहे. पदानुसार गणवेश परिधान करण्याकडे कर्मचारी कानाडोळा करत आहेत. या प्रकारास अटकाव होणे आवश्यक असून, संबंधितांवर तत्परतेने शिस्तभंगाची कारवाई व्हावी, अशी मागणी आहे.’ पत्रकार परिषदेस विक्रम जरग, संभाजी खेबूडकर, विक्रम काटकर, राजू राजमाने उपस्थित होते.