खोराटवाडी (कोल्हापूर): गावात आज सकाळी आठ वाजता टस्कर हत्ती घुसला. गावच्या कमानीतून हत्ती मारुती गल्लीतून मारुती मंदीर पर्यंत गेला. त्याठिकाणाहून परतून तो मासेवाडीच्या भुतोबा परिसराकडे गेला. मानवी वस्तीत हत्ती आल्याने या परिसरात घबराट पसरली. वनविभागाचे कर्मचारी या हत्तीवर लक्ष ठेवून आहेत.

पहिल्यांदा या परिसरात हत्तीचे आगमण झाले. हिरलगे परिसरातून तो जाधेवाडीच्या हद्दीत गेला. भादवणवाडी परिसरातील पेट्रोल पंपाजवळून रस्ता पार करुन तो खोराटवाडीकडे गेला. गावात अचानक हत्ती आल्याने नागरीकांची तारांबळ उडाली. हा हत्ती मासेवाडी परिसरातील भुतोबा देवालयापासून भादवण फाट्याजवळील डोंगरेवाडीकडून कुंभार वसाहतीकडे गेला.

दरम्यान हा हत्ती हालेवाडी आरदाळ परिसरात येण्याची शक्यता असल्याने तेथील ग्रामपंचायतीने संस्कार वाहिनेवरुन ग्रामस्थाना दक्षतेचा इशारा दिला. शेतक-यानी शेतात जाताना सावधानता बाळगावी असा इशारा देण्यात आला. खोराटवाडीचे वनरक्षक नागेश खोराटे या हत्तीवर लक्ष ठेवून आहेत. खोराटे यांची या परिसरात तिन ठिकाणी शेती आहे. हती त्यांच्या तीन्ही शेतात जावून परत माघारी फिरला.