शिरोली दुमाला (कोल्हापूर) :  भोगमवाडी (ता. करवीर) येथील दोन चुलत भावंडांचा शेततळ्यात बुडून मृत्यू झाला. अमित अशोक भोगम (वय १०) व आदर्श बाजीराव भोगम (वय ७) अशी त्यांची नावे आहेत. ही घटना रविवारी रात्री नातेवाईकांच्या निदर्शनास आली. अमित चौथीच्या वर्गात, तर आदर्श पहिलीच्या वर्गात शिकत होता. 
दुपारनंतर घरातून बाहेर पडलेले दोघेही घरी परतले नाहीत.

हेही वाचा- लॉकडाउनची वर्षपूर्ती : ‘तो’ काळ अंगावर शहारे आणणारा!

नातेवाईकांनी शोध घेतला असता शेततळ्याच्या काठावर त्या दोघांच्या चपला व कपडे आढळले. तळ्यात शोध घेतला असता त्यांचे मृतदेह सापडले. अमितच्या मागे भाऊ व आई-वडील आहेत. तर आदर्शच्या मागे दोन बहिणी व आई-वडील असा परिवार आहे. दोन्ही मुलांच्या आई-वडिलांचा आक्रोश हृदय पिळवटून टाकणारा होता. या घटनेची नोंद राधानगरी पोलिसांत झाली आहे.

संपादन- अर्चना बनगे