कोल्हापूर : फक्त महिला कर्मचाऱ्यांकडून चालवले जाणारे जिल्ह्यातले पहिले महिला टपाल कार्यालय सोमवारी (ता. ९) शिवाजी पेठेतील वेताळमाळ तालमीजवळ सुरू होत आहे. या ठिकाणी पूर्वीपासून टपाल कार्यालय आहेच; पण आता या टपाल कार्यालयातील सर्व कर्मचारी महिला असणार आहेत. 
टपाल खात्याच्या धोरणानुसार देशातील प्रत्येक जिल्ह्यात एक महिला टपाल कार्यालय सुरू केले जाणार आहे. त्या धोरणाचाच एक भाग म्हणून कोल्हापूर जिल्ह्यात शिवाजी पेठ पोस्ट ऑफिसच्या माध्यमातून सुरू होत आहे. यापूर्वी मुंबईत एक महिला टपाल कार्यालय सुरू आहे.

हे पण वाचा - ब्रेकिंग - महाराष्ट्र कर्नाटक सीमाप्रश्नी 17 ला महत्वपूर्ण सुनावणी

कोल्हापुरात सुरू होणाऱ्या या टपाल कार्यालयाच्या पोस्टमास्तर म्हणून ज्योत्स्ना वांद्रे व माणिक कदम या काम पाहणार आहेत. 
वेताळमाळ तालमीजवळ या पूर्वीपासून सुरू असलेल्या टपाल कार्यालयात पुरुष कर्मचारी होते. पण टपाल विभागाचे धोरण व महिला टपाल कर्मचाऱ्यांना सोयीचे म्हणून वेताळमाळ तालमीजवळ टपाल कार्यालयाची निश्‍चिती केली. शहरात एकूण २० टपाल कार्यालये आहेत. आता २१वे टपाल कार्यालय फक्त महिला कर्मचाऱ्यांचे असेल. या टपाल कार्यालयात टपाल, अंतर्देशीय विक्री, रजिस्टर पत्रे नोंदणी, पोस्ट बचत खाते, टपाल स्वीकारण्याचे काम होईल. टपाल वितरण मात्र टपाल विभागाच्या बलभीम बॅंक इमारतीतील मुख्य कार्यालयातूनच होणार आहे.
उद्या सकाळी ११ वाजता वेताळमाळ तालमीजवळ टपाल विभागाचे अधीक्षक ईश्वर पाटील, या प्रभागाचे नगरसेवक अजित राऊत व वेताळमाळ तालमीचे सर्व पदाधिकारी, ज्येष्ठ नागरिक यांच्या उपस्थितीत या टपाल कार्यालयाच्या कामाचा 
प्रारंभ होईल.

हे पण वाचा - चला कऱ्हाड कऱ्हाडऽऽऽ! माजी खासदार राजू शेट्टी बनले वडाप चालक 

पोस्टमन ते पोस्टमास्तरपर्यंत महिलाच
देशात विविध पोस्ट कार्यालयांत ४० हजारांहून अधिक महिला कर्मचारी आहेत. टपाल वितरणाचे कामही महिला पोस्टमन करतात. मुंबईत एक कार्यालय फक्त महिला कर्मचाऱ्यांच्याकडून चालवले जाते. या टपाल कार्यालयातील पोस्टमनपासून पोस्टमास्तरपर्यंत सर्व कर्मचारी महिलाच आहेत. आता त्याच धर्तीवर प्रत्येक जिल्ह्यात किमान एक तरी टपाल कार्यालय महिला कर्मचाऱ्यांकडून चालवण्यात येणार आहे. जागतिक महिला दिनाच्या पार्श्वभूमीवर त्याची सुरुवात सोमवारी होणार आहे.