विंग (सातारा) : दोन दिवसांपासून बेपत्ता झालेल्या पोतले (ता. कऱ्हाड) येथील तरूणाचा मृतदेह वांग नदीत शुक्रवारी सकाळी आढळला. कुंटुबीय व ग्रामस्थांनी घातपाताचा संशय व्यक्त केल्याने खळबळ उडाली आहे. मृताची ओळख पटली आहे. अनिल आनंदराव पाटील (वय २२) असे संबंधिताचे नाव आहे. तालुका पोलीसात तेथील एका महिलेसह येणके येथील दोघांवर गुन्हा दाखल होणार असल्याचे पोलिसांनी सांगितले. अनिलचे वडील आनंदराव यांच्या फिर्यादीवरून गुन्हा दाखल केला आहे. पोलीसांनी संबधितावर खुनाचा गुन्हा नोंद करावा. अन्यथा मृतदेह ताब्यात घेणार नाही असा पावित्रा ग्रामस्थांनी घेतल्याने वातावरण तंग झाले.

पोलीस व घटनास्थळावरून मिळालेली माहितीनुसार पोतलेतील जुने गावठाण येथील अनिल पाटील मंगळवारपासून संशयितरित्या बेपत्ता होता. नातेवाईक व ग्रामस्थ त्याच्या शोधात होते. बेपत्ता असल्याची तक्रार पोलीसांत दिली होती. आज सकाळी तेथील गावठाणालगत महारकी नावाच्या शिवारात वांग नदी जलाशयात तरूणाचा मृतदेह तरंगताना आढळला. तेथील शेतकऱ्याने पाहिले. त्यांनी ग्रांमस्थांना माहिती दिली व पोलीसांनाही कळवले. त्यानंतर तेथील युवकाच्या मदतीने मृतदेह बाहेर काढण्यात आला. मृतदेह अनिलचा असल्याचे यावेळी उघडकीस आले. घटनास्थळी ग्रासस्थांनी मोठी गर्दी केली होती. घातपाताचा संशय ग्रामस्थांतून व्यक्त केला जात होता. कोळे दूरक्षेत्र पोलीस उपनिरिक्षक अशोक भापकर व कर्मचाऱ्यांनी घटनास्थळी पंचनामा केला. त्यानंतर मृतदेह शवविच्छेदनास कऱ्हाडला पाठविला. वडील आनंदराव पाटील यांनी त्याबाबत कऱ्हाड पोलीसात दिलेल्या फिर्यादीवरून संशयित म्हणून पोलीसांनी तेथील महिलेसह येणके येथील अन्य दोघांना ताब्यात घेतले आहे. संशयितांवर खुनाचा गुन्हा नोंद करावा अशी मागणी नातेवाईक व ग्रामस्थांनी तालुका पोलीसांना यावेळी केली. त्याशिवाय मृतदेह ताब्यात न घेण्याचा पावित्रा घेतला. त्यामुळे तणावाचे वातावरण निर्माण झाले. पोलीसांनी योग्य आश्वासन दिल्यानंतर सायंकाळी उशीरा मृतदेह ताब्यात घेतला. अनिलला पत्नी, एक मुलगा आई-वडील व अन्य दोन भाऊ असा परिवार आहे. गाव व परिसरात त्याचा मोठा मित्र परिवार होता. अचानक घडलेल्या घटनेमुळे गाव व परिसरातून हळहळ व्यक्त होत आहे.