Miraj News: खंडेराजुरी (ता. मिरज) येथे होळकर चौकात पुर्वीच्या वादातून तरूणावर चाकूने सपासप वार करून निर्घृण खून करण्यात आला. सुमित जयवंत कांबळे (वय २१) असे मृत तरूणाचे नाव आहे. काल रात्री नऊच्या सुमारास ही घटना घडली.

संशयित सूरज आठवलेसह पाच साथीदारांना ग्रामीण पोलिसांनी ताब्यात घेतल्याचे समते आहे. त्याता दोन अल्पवयीन मुलांचाही सहभाग असल्याचे समजते आहे. पुर्वीच्या वादातूनच हा खून झाला असावा, असा पोलिसांचा प्राथमिक अंदाज आहे. दरम्यान, एकापाठोपाठ दोन खुनाच्या घटना घडल्याने खळबळ उडाली आहे.

घटनास्थळ व पोलिसांकडून मिळालेली माहिती अशी की, सुमित कांबळे हा खंडेराजुरीत कुटुंबासह राहतो. तो सध्या सैन्य दल भरतीची पुर्व तयारी करत होता. काही दिवसांपुर्वी खंडेराजुरीत झालेल्या मिरवणूकीत सुमित आणि संशयितांत वाद झाला होता.crim

या वादाची धुसपुस कायम होती. काल रात्री सुमित चौकात थांबला होता. त्यावेळी संशयित आणि त्याच्यात पुन्हा वाद झाला. वाद टोकाला गेल्यानंतर संशयिताने चाकूने सपासप वार केले. त्यातील एक वार वर्मी असल्याने रक्तस्त्राव झाला. त्यातच त्याचा मृत्यू झाला. त्यानंतर गावात एकच खळबळ उडाली.

दरम्यान, मिरजेतील शासकीय रुग्णालयात काल रात्री उशीरा उत्तरीय तपासणी करण्यात आली. पोलिसांनी घटनास्थळ पंचनामा केला. संशयित सूरज आठवलेसह काही जण ताब्यात घेतल्याचे समजते आहे. त्यात अल्पवयीन मुलांचाही सहभाग आहे, असे पोलिसांनी सांगितले. निरीक्षक भैरू तळेकर यांच्यासह पथक घटनास्थळी दाखल होते.