नगर : निंबळक बाह्यवळण रस्त्यावर तरुणाचा चाकूने भोसकून आणि गळा आवळून खून करण्यात आला. आज सकाळी नागरिकांनी मृतदेह पाहिल्यानंतर पोलिसांना कळविले. पोलिसांनी घटनास्थळी जाऊन तत्काळ तपास सुरू केला. 

नवनाथ गोरख वलवे (वय 32, रा. सारोळे कासार, ता. नगर) असे मृताचे नाव आहे. नवनाथ याच्याकडे स्वमालकीची मालट्रक असून, तो स्वत:च ट्रक चालवीत होते. आज सकाळी निंबळक बाह्यवळण रस्त्याजवळ त्याचा मृतदेह असल्याची माहिती एमआयडीसीचे सहायक पोलिस निरीक्षक मोहन बोरसे यांना मिळाली. ते पथकासह घटनास्थळी दाखल झाले. मृतदेहाची पाहणी केली असता त्याच्या पोटामध्ये चाकूने भोसकून वार आणि गळा दाबून खून केल्याचे प्रथमदर्शनी आढळून आले. पोलिसांनी मृतदेह उत्तरीय तपासणीसाठी जिल्हा रुग्णालयात हलविला. 

हेही वाचा ः मोबाईलने घेतला तरुणाचा जीव

दरम्यान, त्याचा खून कोणी व कशासाठी केला, याचा पोलिस शोध घेत आहेत. याबाबत एमआयडीसी पोलिस ठाण्यात गुन्हा नोंदविण्याचे काम रात्री उशिरापर्यंत सुरू होते. 

ट्रक लुटून खून केल्याचा संशय 

नवनाथ वलवे याची स्वमालकीच्या ट्रकमध्ये अन्य पार्टनर आहे. मालट्रकमध्ये इंदापूर येथे दूध पावडर भरून तो कटक (ओडिशा) येथे चालला होता. निंबळक बाह्यवळण रस्त्यावर ट्रक लुटून त्याचा खून केला. मालट्रकसह 85 लाख रुपयांचा मुद्देमाल पळवून नेला, असा संशय व्यक्त केला जात आहे. 

अारोपींचा शाेध लागेपर्यंत मृतदेह ताब्यात घेणार नाही ः वलवे

मला काहीच माहिती नव्हते. मुलाचा खून झाल्याचे समजल्यानंतर मी हादरून गेलो होतो. आरोपींचा शोध लागेपर्यंत मृतदेह ताब्यात घेणार नाही. 
- गोरख वलवे, मृत तरुणाचे वडील 

चक्का जाम आंदाेलन करणार ः परदेशी

महामार्गावर मालट्रक लुटून तरुणाचा खून होतो, ही दुर्दैवी घटना आहे. येत्या दोन दिवसांत पोलिसांनी आरोपींना अटक न केल्यास जिल्हाधिकारी कार्यालयावर प्रहार संघटनेतर्फे चक्का जाम आंदोलन करण्यात येईल. 
- विनोदसिंग परदेशी, जिल्हाध्यक्ष, प्रहार संघटना