श्रीरामपूर : स्वच्छ भारत अभियानात शहराला 44 लाखांचा निधी जाहीर झाला. हा निधी योग्य पद्धतीने खर्च करावा. स्वच्छतेच्या जागृतीऐवजी प्रत्यक्ष स्वच्छतेवर खर्च करण्याचा निर्णय आजच्या पालिकेच्या सभेत सर्वानुमते झाला. 

ठळक बातमी- नगरमध्ये काय घडलं छत्रपती-रामदासांबद्दल 

नगराध्यक्ष अनुराधा आदिक यांच्या अध्यक्षतेखाली पालिकेची आज सभा झाली. उपनगराध्यक्ष करण ससाणे, प्रभारी मुख्याधिकारी श्‍यामराव जाधव उपस्थित होते. पालिका अधिकाऱ्यांनी कचरासंकलनावर होणाऱ्या खर्चाची वेळोवेळी माहिती घ्यावी. अनेक प्रभागांतील कचरा नियमित उचलला जात नसल्याने संबंधित ठेकेदारांच्या ठेक्‍यातून पैशांची कपात करावी, अशी मागणी नगरसेवकांनी केली. त्यावर आदिक यांनी ठेकेदाराचे सुमारे 2 लाख रुपये कपात करण्याचा आदेश दिला. 

शिकलकरी समाजाच्या लोकवस्तीत स्वच्छतागृहाचे बांधकाम करण्याची मागणी आमदार लहू कानडे यांनी केली होती. मात्र, ही बाब नगराध्यक्षांनाच माहीत नसल्यामुळे विरोधकांनी पालिका प्रशासनास धारेवर धरले.

हेही वाचा- तीच्या मुलावर आली संक्रांत 

त्यानंतर हे प्रकरण शासकीय मंजुरीसाठी पाठविल्याचे अधिकाऱ्यांनी सांगितले. पाणीपुरवठा विभागाची सुमारे 14 कोटींची वसुली थकीत असून, संबंधितांवर कारवाई करण्यावर चर्चा झाली. पुढील काळात शहरासाठी 133 किलोमीटर अंतराची नव्याने पाइपलाइन केली जाणार असल्याचे अधिकाऱ्यांनी सांगितले. रस्त्यावरील खड्ड्यांचा प्रश्‍न नगरसेवक मुझफर शेख यांनी मांडला. 

पालिकेच्या जागेचे भाडे आकारणाऱ्या ठेकेदाराची थकबाकी तत्काळ वसूल करून बंद 500 टपऱ्या ताब्यात घेऊन पालिकेचा महसूल वाढवावा, अशी सूचना आदिक यांनी केली. शहरातील बाजार रस्त्यावर भरला जात असून, त्यावर कारवाई करण्याची मागणी नगरसेवक संजय फंड, श्रीनिवास बिहाणी यांनी केली. 

शिवरायांच्या नावावर राजकारण नको : ससाणे 
बेलापूर रस्त्यावरील कमानीला छत्रपती शिवाजी महाराजांचे नाव देण्यावरून सभागृहात गदारोळ झाला. सत्ताधारी नगरसेवकांनी या मागणीला समर्थन देत जल्लोष केला. त्यावर पालिकेने या कमानीचे बांधकाम केलेले नसल्याने नाव ठरविणारे हे कोण, असा सवाल नगरसेवक संजय फंड यांनी केला. महाराजांच्या नावावर राजकारण करू नका. नाव देण्यास कोणाचाही विरोध नाही. कमानीचे बांधकाम करणाऱ्यांना विश्वासात घेऊन हा निर्णय घ्यावा, असे उपनगराध्यक्ष करण ससाणे यांनी स्पष्ट केले.