कुंडल : सध्याच्या सरकारचा गैरकारभार व त्यांना निवडणुकीत पराभवाची भीती वाटत असल्याने लांबवीत गेल्या आहेत, अशी टीका आमदार शशिकांत शिंदे (Shashikant Shinde) यांनी येथे केली. राष्ट्रवादी काँग्रेसच्या पलूस, कडेगाव तालुका बूथ कमिटी आढावा बैठक बलवडी फाट्यावरील कार्यालयात झाली, त्या वेळी ते बोलत होते.

आमदार अरुण लाड, अध्यक्ष अविनाश पाटील, कार्याध्यक्ष बाबासाहेब मुळीक, सरचिटणीस बाळासाहेब पाटील, महिलाध्यक्षा सुश्मिता जाधव, गटनेते शरद लाड, पूजा लाड प्रमुख उपस्थित होते. आमदार शिंदे म्हणाले, एका बाजूला सत्तेची मस्ती असणारे लोक आहेत आणि दुसऱ्या बाजूला जनतेची क्रांती आहे. या दोघांचीच लढाई भविष्यात लोकशाहीसाठी लढावी लागणार आहे.

त्यासाठी सर्वजण सज्ज राहा. सर्व निवडणुकांच्या विजयाचा बूथ कमिट्या हा एकच यशस्वी राजमार्ग असल्याने त्या सक्षम करा. निवडणुकीपुरती बूथ कमिटी नसावी, संबंधित विभागातील सामाजिक कार्यात ही सक्रिय काम करा. महिलांमध्ये विलक्षण ताकद असल्याने बूथ कमिटीत सहभाग अधिक असावा. आगामी काळात लढणाऱ्या कार्यकर्त्यांना नेहमी संधी मिळेल, असंही शिंदे म्हणाले.

आपली माणसं सत्तेत असली की किती फायदा होतो, हे अरुण लाड यांच्याकडे पाहिल्यावर लक्षात होते. शरद लाड यांना भविष्य चांगले आहे. त्यांच्याकडे नेतृत्वकौशल्य चांगले आहे. या भागात आघाडी होईल की नाही, माहिती नाही. मात्र कामात राहा, कामात राहिलं की संधी नक्की मिळते. तुमच्या कामाची प्रगल्भता अध्यक्ष शरद पवार यांनी ओळखली आहे. तेव्हा भविष्यात चांगली संधी नक्की मिळेल, असंही शिंदेंनी स्पष्ट केलं.

आमदार अरुण लाड म्हणाले, न रडत न बसता लढत राहणं, हेच आम्ही शिकलो. तेव्हा आपण कामात राहू या. कोणतीही तक्रार न करता पक्षासाठी झटूया. प्रत्येक बूथ कमिटीने सक्षमणे काम केल्याने या परिसरात पक्ष वाढत आहे. मतदारांनी आपल्याकडे येण्यापेक्षा आपणच त्यांच्यापर्यंत पोहोचू. यातून सामान्यांची लहानात लहान कामेही मार्गी लावूया.

यावेळी सुशांत देवकर, विश्वास पाटील, मेघा पाटील, पलूस तालुकाध्यक्ष मोहन पाटील, नंदा पाटील, डी. एस. देशमुख, वैशाली मोहिते, जयदीप यादव, सुरेश शिंगटे, महेंद्र करांडे, सतीश पाटील, जगदीश महाडिक, नितीन नवले, अरुणा जाधव, मृणाल पाटील, ज्ञानेश पाटील यांच्यासह पलूस, कडेगाव तालुक्यातील बहुसंख्य कार्यकर्ते उपस्थित होते. इंद्रजित पवार यांनी स्वागत केले. जिल्हा परिषद गटनेते शरद लाड यांनी प्रास्ताविक केले. संतोष जाधव यांनी सूत्रसंचालन केले. सुरेश शिंगटे यांनी आभार मानले.