सातारा - येत्या नवीन शैक्षणिक वर्षापासून दुसरी व अकरावीचा अभ्यासक्रम बदलण्यात येणार आहे. मात्र, तिसरीचा अभ्यासक्रम यंदा बदलण्यात येणार नसल्याचे ‘बालभारती’ने जाहीर केले आहे. 

पहिली ते बारावीचा अभ्यासक्रम ठरविण्यासाठी एकच अभ्यास मंडळ तयार केले असून, या मंडळामार्फत अभ्यासक्रम बदलण्यात येत आहेत. गेल्या शैक्षणिक वर्षी (२०१७-१८) सातवी व नववीचा; तर यंदा (२०१८-१९) पहिली, आठवी व दहावीचा अभ्यासक्रम बदलला होता. एक फेब्रुवारी २०१८ च्या पत्रान्वये राज्यात जून २०१९ या नव्याने सुरू होणाऱ्या शैक्षणिक वर्षात दुसरी, तिसरी व अकरावीचा अभ्यासक्रम बदलणार असल्याची माहिती समोर आली होती. मात्र, ‘बालभारती’ने त्यात बदल करीत १७ जानेवारीच्या पत्रान्वये केवळ दुसरी व अकरावीचा अभ्यासक्रम बदलण्याच्या निर्णयावर शिक्कामोर्तब केले आहे. त्यामुळे यंदाच्या नव्या शैक्षणिक वर्षापासून तिसरीचा नवा अभ्यासक्रम येणार नाही. एखाद्या वर्गाचा अभ्यासक्रम बदलण्याची सूचना शैक्षणिक वर्ष सुरू होण्यापूर्वीच द्यावी लागते. गेल्या वर्षी तिसरीच्या अभ्यासक्रमातही बदल करणे प्रस्तावित केले होते. मात्र, बालभारतीने आता या निर्णयान्वये तिसरीचा अभ्यासक्रम न बदलण्याचे ठरविले आहे. त्यामुळे यंदा फक्त दुसरीचा अभ्यासक्रम बदलेल. मात्र, तिसरीचा अभ्यासक्रम कधी बदलणार, याबाबत स्पष्ट संकेत नाहीत.

जुना स्टॉक जमा करणार
राज्य पाठ्यपुस्तक निर्मिती केंद्राकडून पाठ्यपुस्तक विक्रेत्यांना पत्र लिहून जुनी पुस्तके बदण्याची विनंती केली होती. यात दुसरी व अकरावीच्या पुस्तकांसाठी २०१८-१९ हे शेवटचे वर्ष असेल. पुढील वर्षी या इयत्तांची नवी पुस्तके बाजारात येतील. त्यामुळे जुना स्टॉक ‘बालभारती’कडे जमा करण्याच्या सूचनाही वितरक व दुकानदारांना दिल्या आहेत.