सोलापूर : स्मार्ट सिटीकडे वाटचाल सुरु असलेल्या सोलापूरचे भवितव्य ज्या अधिकाऱ्यांच्या हाती आहे, त्याच अधिकाऱ्यांच्या "एसएमसी ऑफिसिअल' या व्हॉटस्‌अप ग्रुप वर "पॉर्न व्हिडीओं'चा धिंगाणा सुरु असल्याचे दिसून आले. या ग्रुपवर खानदानी आणि सुसंस्कृत घराण्यातील महिला अधिकारीही आहेत. त्यामुळे हे प्रकरण दडपण्याचे प्रयत्न सुरु आहेत. 

अरे वा.. तर सोलापुरात होऊ शकतो महाशिवआघाडीचा महापौर

महापालिकेच्या कामकाजासंदर्भात काही सूचना करायची असल्यास ते सोईचे व्हावे, वर्तमानपत्रामध्ये आलेल्या बातम्यांची दखल घेऊन संबंधितांनी योग्य ती कारवाई करावी या संदर्भातले आदेश तत्पर पोचावेत यासाठी महापालिका आयुक्तांसह सर्व अधिकारी, खातेप्रमुख आणि विशेष नियुक्ती केलेल्या कर्मचाऱ्यांचा हा ग्रुप आहे. त्या ग्रुपवर हे व्हिडीओ ग्रुपवरील एका सदस्याकडून रात्रीच्या वेळी अपलोड झाले. हा प्रकार ध्यानात आल्यावर ग्रुपवरील सर्वांचीच विशेषतः महिला अधिकाऱ्यांची झोप उडाली. अनेकांनी या प्रकाराबद्दल नापसंती व्यक्त केली, तर काहीजणांनी ग्रुपमधून लेफ्ट होणे पसंद केले. दरम्यान, या प्रकरणाची वाच्यता होऊ नये यासाठी ग्रुपमधील बहुतांश सदस्यांना "रिमुव्ह' करण्यात आले. हा प्रकार बाहेर कोणालाही कळणार नाही याची पूरेपर दक्षता घेण्यात आली. 

राष्ट्रपती राजवट या महापालिकेसाठी आपत्ती

हा प्रकार ग्रुपवर असलेल्या आयुक्तांपासून कर्तव्यकठोर अधिकाऱ्यांना माहिती आहे. मात्र तरीही त्याची वाच्यता होऊ नये यासाठी धडपड सुरु आहे. आयुक्त दीपक तावरे प्रशिक्षणासाठी दौऱ्यावर गेले आहेत. त्यामुळे प्रभारी आयुक्ताचा पदभार जिल्हाधिकारी डॉ. राजेंद्र भोसले यांच्याकडे आहे. महापालिका सभेत डॉ. भोसले यांनी नगरसेवकांनी विचारलेल्या प्रश्‍नांना दिलेली उत्तरे ऐकून प्रत्येकजण प्रभावित झाला आहे. त्यामुळे ते या प्रकरणाची गंभीर दखल घेतील आणि "भ्रष्टाचारी व कामचुकारांना पाठिशी घालणारी महापालिका' हा गैरसमज ते दूर करतील, अशी अपेक्षा व्यक्त होत आहे. 

या प्रकरणी संबंधित अधिकाऱ्यास कारणे दाखवा नोटीस बजावली आहे. उद्या (शुक्रवारी) संबंधित अधिकारी त्याचे म्हणणे सादर करेल. त्यानंतर पुढील धोरण ठरविण्यात येईल. 
- अजयसिंह पवार, उपायुक्त, सोलापूर महापालिका