बेळगाव : शहरातील अनेक तरुण-तरुणी पुणे, मुंबई, बंगळुरसारख्या शहरातील आयटी कंपनीत काम करतात. कोरोनामुळे दोन वर्षापासून आयटी कंपन्यांतील कामगारांना घरातूनच काम करण्याच्या (Work from home) सुचना दिल्या होत्या. त्यांचे अजूनही घरातूनच काम सुरु असून कोरोनाचा (corona) संसर्ग पुन्हा वाढत असल्याने अजून काही महिने त्यांना घरातूनच काम करावे लागणार आहे.

कोरोनाच्या पहिल्या लाटेवेळी संसर्ग टाळण्यासाठी मोठ-मोठ्या शहरातील आयटी कंपन्यांनी आपल्या कामगारांना ‘वर्क फ्रॉम होम’च्या सुचना केल्या होत्या. त्यानंतर कोरोना रुग्णसंख्या कमी झाली. मात्र, पुन्हा दुसरी लाट व आता पुन्हा रुग्ण संख्येत वाढ होत असल्याने त्या कामगारांना पुन्हा घरातूनच काम करण्याच्या सुचना केल्या आहेत. पुणे, मुंबई, बंगळूरसारख्या शहरात आयटी कंपन्या आहेत. हजारो कर्मचारी व अधिकारी या कंपन्यांमध्ये काम करतात. कोरोना हा संसर्गजन्य रोग असल्याने विशेष दक्षता घेण्याची भुमिका या कंपनी चालकांनी घेतली आहे.

आयटी कंपन्यांचे बहुतांश काम हे इंटरनेट आणि संगणकावर चालते. घरी, इंटरनेट, संगणक अथवा लॅपटॉप असल्यास आयटी कर्मचाऱ्यांना घरात बसून त्यांचे ऑफीसचे काम करता येते. पण कंपनीत अनेक कर्मचारी एकत्र येत असल्याने विषाणू संसर्गाची भिती आहे.

''दोन वर्षापासून आयटी कंपन्यांचे ‘वर्क फ्रॉम होम’ सुरु आहे. जानेवारीत कर्मचाऱ्यांना कामावर येण्याच्या सुचना काही कपन्यांनी केल्या होत्या. मात्र, ओमीक्रॉनमुळे पुन्हा एप्रिलपर्यंत कामावर रुजू होणे पुढे ढकलले आहे.''

-अमित देसाई, सॉप्टवेअर इंजिनिअर