वांगी - वांगी (ता. कडेगांव ) जवळ कडेपूरकडून ऊस भरुन भरधाव वेगाने चाललेल्या ट्रॅंक्‍टरची मोटारसायकलला धडक बसली. काल रात्री झालेल्या या अपघातामध्ये दुचाकीस्वार जागीच ठार झाला. दादासो बळवंत जगदाळे ( वय 68 रा. मलकापुर, ता. कराड ) असे मृत व्यक्तीचे नाव आहे. 

चिंचणी-वांगी पोलीसांतून मिळालेली अधिक माहिती अशी कि, मलकापूर येथील दादासो बळवंत जगदाळे यांची शेळकबाव ( ता. कडेगांव ) येथे शेती आहे. सोमवारी रात्री 8 च्या दरम्यान ते शेतातील कामे आवरून शेळकबाव येथून वांगीमार्गे दुचाकीवरुन ( एम. एच 09 टी 8524 )  मलकापुरकडे निघाले होते.  दरम्यान शंकर ज्ञानु पाटील रा. पुंणदी ( ता. पलुस ) यांच्या मालकीचा ट्रॅक्टर  ( एम. एच.11 जी.1306 )  हा कडेपुरकडून ऊस घेऊन चालला होता. वांगीच्या उत्तरेस जून्या सांगली-सातारा रस्त्यावर ट्रॅंक्‍टरची दुचाकीला धडक बसली. धडकेनंतर जगदाळे खाली पडले. त्यांच्या अंगावरून ऊसाने भरलेल्या ट्राॅल्या गेल्याने ते जागीच ठार झाले.