पाटण (सातारा) : दारुच्या नशेत भरधाव चारचाकीने रस्त्याशेजारी वाढदिवसाचा फ्लेक्स लावत असलेल्या पाचजणांना उडविले आहे. अडुळपेठ (ता. पाटण) येथे रात्री ११ वाजता ही घटना घडली असुन एकाचा मृत्यु, एकजण गंभीर व तीनजण किरकोळ जखमी झाले आहेत. साहिल दिनकर निवडुंगे असे अपघातात मृत झालेल्या युवकाचे नाव आहे. जखमींवर कराड येथील कृष्णा रुग्णालयात उपचार सुरु आहेत.

याबाबत घटनास्थळावरुन मिळालेली माहिती अशी की, एका मित्राच्या वाढदिवसाचा फ्लेक्स कराड-चिपळुण महामार्गालगत २० फुट अंतरावर अडुळपेठ येथे २० ते २५ जण रात्री ११ वाजण्याच्या दरम्यान लावत होते. त्यावेळी नवारस्त्याहुन पाटणकडे येणाऱ्या चारचाकी तवेरा गाडीचालकाने दारुच्या नशेत या तरुणांच्या आंगावर गाडी घातली. यामध्ये पाचजण जखमी झाले. 

जखमींना तात्काळ कृष्णा रुग्णालय कराड येथे उपचारासाठी दाखल केले. त्यामध्ये साहिल दिनकर निवडुंगे (वय १९) याचा रात्री उपचारा दरम्यान मृत्यु झाला. जखमी इतर चार पैकी महेश दत्तात्रय शिर्के (वय १९) गंभीर जखमी झालेला आहे. रविंद्र शिवाजी नलवडे (वय २०), गणेश रामचंद्र शिर्के (वय १८) व किशोर दत्तात्रय शिर्के (वय १८) हे किरकोळ जखमी झाले असुन त्यांच्यावरही उपचार करण्यात येत आहेत. या घटनेची नोंद पाटण पोलिसात अजुन झाली नसुन अडुळ गावावर शोककळा पसरली आहे.