बेळगाव : ग्रामपंचायत अध्यक्ष निवडणुकीत पराभव झाल्याने निराश झालेल्या विवाहितेने माहेरी येऊन विहिरीत उडी घेऊन आत्महत्या केली. ही घटना काल (ता. १२) मन्नीकेरी (ता. बेळगाव) येथे घडली. यल्लूताई मारुती गावडे (वय ३२, रा. सोनारवाडी ता. चंदगड) असे त्यांचे नाव आहे. घटनेची नोंद काकती पोलिसांत झाली आहे.

यल्लूताई यांचे माहेर मन्नीकेरी असून सोनारवाडी (ता.चंदगड) हे त्यांचे सासर आहे. चंदगड तालुक्‍यातील सोनारवाडी येथून ग्राम पंचायत निवडणूक लढवून त्या विजयी झाल्या होत्या. तर अध्यक्षपदासाठी त्यांनी अर्ज दाखल केला होता. मात्र, या निवडणुकीत पराभव झाला. त्यामुळे काही दिवसांपासून त्या 
निराश बनल्या होत्या. दोन दिवसांपूर्वी वडिलांनी त्यांना मोहेरी बोलावून आणले होते.

हेही वाचा - साहेब, तुमच्या उलटा नाही तर शिलेदार म्हणून काम करू -

शुक्रवारी रात्री त्यांनी मन्नीकेरी येथे माहेरी एका विहिरीत उडी घेऊन आत्महत्या केली. शनिवारी सकाळी ही घटना उघडकीस येताच काकती पोलिसांनी घटनास्थळी भेट देऊन पंचनामा केला. स्थानिकांच्या मदतीने मृतदेह विहिरीतून बाहेर काढण्यात आला. याप्रकरणी मयत यल्लूताईंची आई मल्लव्वा शिवमूर्ती सनदी यांनी पोलिसात फिर्याद दाखल केली आहे. जिल्हा रुग्णालयातील शवागृहात शल्यचिकित्सा करुन मृतदेह नातेवाईकांच्या ताब्यात देण्यात आला.

संपादन - स्नेहल कदम