चिक्कोडी : कब्बूर शहराच्या बाहेर निपाणी-मुधोळ राज्य महामार्गावर असलेल्या टोल नाक्याजवळ ऊस वाहतूक करणाऱ्या ट्रॅक्टर व कारची समोरासमोर धडक झाली. त्यात कब्बूर येथील दोघा युवकांचा मृत्यू झाला तर एक युवक गंभीर जखमी आहे. त्याला अधिक उपचारासाठी शासकीय रुग्णालयात दाखल करण्यात आले आहे. उदय बापू शिवाईगोळ (वय 23) व कारचालक मारुती नागाप्पा हुल्लोळी (वय 23) अशी मयतांची नावे आहेत.

बुधवारी (ता. १) रात्री हा अपघात घडला असून चिक्कोडी पोलिसात नोंद झाली आहे. याबाबत समजलेली अधिक माहिती अशी, बुधवारी (ता. 1) रात्री उसाच्या भरलेल्या चिक्कोडीकडे निघालेल्या ट्रॅक्टरला ओव्हरटेक करताना कारची मागून जोराची धडक बसली. या अपघातात उदय बापू शिवाईगोळ हा जागीच ठार झाला.

तर कारचालक मारुती नागाप्पा हुल्लोळी (वय 23) हा गंभीर जखमी झाला होता. त्याला त्वरित उपचारासाठी बेळगाव येथे हलविण्यात आले. तेथील रुग्णालयात उपचार सुरू असताना त्याचा मृत्यू झाला. तसेच विशाल भीमाप्पा कांबळे या जखमीवर रुग्णालयात उपचार सुरू आहेत.

घटनेची माहिती समजताच तात्काळ घटनास्थळी मंडल पोलिस निरीक्षक आर. आर. पाटील, चिक्कोडी पोलिस ठाण्याचे उपनिरीक्षक यमनाप्पा मांग यांनी भेट देऊन पंचनामा केला. या घटनेची नोंद चिक्कोडी पोलिस स्थानकात झाली असून अधिक तपास सुरू आहे.