शिर्डी : नुकत्याच प्रदर्शित झालेल्या मर्दिनी-2 या हिंदी चित्रपटाची नायिका राणी मुखर्जी हिने आज येथे येऊन साईबाबांच्या समाधीचे दर्शन घेतले. साईमंदिरात बाबांची करुणा भाकताना भावुक झालेल्या राणीला अश्रू अनावर झाले. "माझ्या डोळ्यांतील अश्रू हे बाबा आणि माझ्यातील गुपित आहे. मी विवाहबद्ध झाले. मला मुलगी झाली. बाबा सदैव माझ्याबरोबर होते. त्यांना धन्यवाद द्यायचे होते. आज बाबांनी बोलावले आणि मी आले,' अशा शब्दांत तिने भावना व्यक्त केल्या. 

हेही वाचा निळवंडेच्या कामासाठी मंत्री थोरात सरसावले 

राणी मुखर्जीने साई मंदिरात दर्शन घेतल्यानंतर साई संस्थानचे कार्यकारी अधिकारी दीपक मुगळीकर यांनी साईबाबांची संगमरवरी मूर्ती व भरजरी शाल देऊन तिचा सत्कार केला. मुख्य लेखापाल बाबासाहेब घोरपडे उपस्थित होते. पत्रकारांशी बोलताना तिचे डोळे पाणावले होते. साईभक्त असलेल्या राणीला बाबांच्या नगरीत स्वतःचा बंगला बांधायचा होता. दहा वर्षांपूर्वी तिने त्यासाठी जागाही खरेदी केली. मात्र, ही खरेदी कायद्याच्या कचाट्यात अडकली. त्यात बराच वेळ गेला. येथे बंगला बांधण्याचे तिचे स्वप्न अद्याप पूर्ण होऊ शकले नाही. त्याबाबत ती म्हणाली, ""तुम्ही त्यासाठी साईबाबांकडे प्रार्थना करा.'' 

हेही वाचा कुर्मींचे ऐक्‍य देशाला बळकटी देणारे : अरविंद सावंत