बेळगाव : शहर आणि परिसरात रविवारी सांयकाळी पावसाने हजेरी लावली. तसेच अचानक आलेल्या पावसामुळे शहरात गारवा निर्माण झाला. नागरिकांनाही गरमीपासून काही प्रमाणात दिलासा मिळाला आहे. मात्र लॉकडाऊनमुळे सर्व व्यवहार बंद असल्याने पावसाचा काही ठिकाणी बाजारपेठेवर परिणाम जाणावला.

गेल्या काही दिवसांपासून शहर आणि परिसरात पावसाने सातत्याने हजेरी लावली आहे. शनिवारी तालुक्याच्या विविध भागात झालेल्या जोरदार पावसामुळे शेतकऱ्यांचे मोठे नुकसान झाले होते. तसेच कडोली, अगसगा, जाफरवाडी, हंदीगणुर, देवगिरी आदी भागात वीज खांब व झाडाच्या फांद्या कोसळल्याने वीज पुरवठा खंडित झाला होता. परंतु शहराला पावसाने हुलकावणी दिली होती. दुपारनंतर ढगांची गर्दी जमा झाल्याने सायंकाळी पाचच्या सुमारास गडगडाटासह पावसाला सुरवात झाली. त्यानंतर टिळकवाडी वडगाव शहापूर गोवा शहराच्या विविध भागात पावसाने हजेरी लावली.

सीबीटी परिसरात पावसाचा जोर अधिक होता. त्यामुळे या भागात चिखल निर्माण झाला होता. तर काही भागात वाऱ्यामुळे फांद्या तुटून पडल्याने वीज पुरवठ्यावर परिणाम झाला होता. शहरात पावसाचा जोर कमी असला तरी पावसाची संततधार कायम असल्याने नागरीकांना अनेक वेळ घरातून पावसाचा आंनद मिळाला. दरवेळी पावसाला सुरुवात होताच फेरीवाले व भाजीविक्रेत्यांची एकच तारांबळ उडते. मात्र यावेळी सर्व व्यवहार बंद असल्याने कोणालाही त्रास झाला नाही. पावसामुळे गारवा निर्माण झाल्याने काही वेळ घरातील पंख्यांची खरकर बंद झाली होती. तसेच पावसाच्या संततधारेमुळे शहरातील रस्त्यांवर काही प्रमाणात असणारी वर्दळही कमी झाली होती.