शिर्डी ः हिंदी चित्रपट सृष्टीतील अभिनेत्री राणी मुखर्जी आणि अभिनेत्री शिल्पा शेट्टी या दोन्ही अभिनेत्रींची मनोकामना साईबाबांनी नव्या वर्षात पूर्ण केली. तब्बल बारा वर्षांच्या कालखंडानंतर शिल्पाचे निकम्मा व हंगामा हे दोन चित्रपट येत आहेत. अभिनेत्री राणीचा मर्दानी-2 हा चित्रपट नव्या वर्षात प्रदर्शित झाला. याबद्दल साईंची कृतज्ञता व्यक्त करण्यासाठी आधी राणीने आणि परवा शिल्पाने साईंच्या दरबारात हजेरी लावली. साईबाबांविषयी आदरभाव प्रकट केला. 
अभिनेत्री राणी व तिचे वडील राम मुखर्जी यांची साईबाबांच्या शिर्डीत बंगला बांधण्याची मनापासून इच्छा होती. त्यासाठी त्यांनी येथे अकरा गुंठे जमिन खरेदी केली. मात्र ही जमीन बिगरशेती आहे की नाही या कारणावरून वाद निर्माण झाला. उच्च न्यायालयात चार वर्षे वाद सुरू होता. दोन वर्षापूर्वी मुखर्जी कुटुंबाच्या बाजूने निकाल लागला. त्यांच्या स्वप्नपूर्तीच्या दिशेने एक पाऊल पुढे पडले. मात्र, काही दिवसांपूर्वी राम मुखर्जी यांचे निधन झाले. आता राणी येथे बंगला बांधणार का? याकडे तिच्या चाहत्यांचे लक्ष लागले आहे. 

जाणून घ्या-इंदुरीकरमहाराजांचे बर्थ डे सेलिब्रेशन... म्हणाले, पवार साहेब तर देव माणूस

अभिनेत्री शिल्पा शेट्टी हीदेखील निस्सीम साईभक्त. ती तब्बल बारा वर्षे चित्रपटसृष्टीच्या बाहेर होती. आता दूरचित्रवाणीवरील सुपर डान्सर या शोमध्ये नृत्य करते. शिवाय तिचे एकापाठोपाठ एक दोन चित्रपट प्रदर्शित होत आहेत. आयुष्याच्या प्रत्येक वळणार साईबाबांचे साथ असते, अशा शब्दात तिने परवा बाबांविषयी आदरभाव व्यक्त केला. 

मी नाही दिला सुवर्ण मुकूट 
शनिवारी (ता.25) अभिनेत्री शिल्पा शेट्टी हिने आपल्या कुटूंबियां समावेत साईदर्शन घेतले. यावेळी तिला साईसंस्थान च्या वतीने संगमरवरी मूर्ती भेट देण्यात आली. या भेटीत अभिनेत्री शिल्पा शेट्टी हिने साईमंदिरातील साईबाबांच्या मुर्तीसाठी सुवर्ण मुकूट भेट दिला नाही. असे तिच्या निकटवर्तीयांनी तसेच साईसंस्थानच्या वतीने सांगण्यात आले.