बेळगाव: कोरोना विषाणूला टक्कर देत पोटाची खळगी भरण्यासाठी हातात फावडा व बुटी घेऊन "रोहयो' तील कामगार कामावर हजर झाले आहेत. बेळगाव तालुक्‍यातील 59 ग्राम पंचायतीमधील 4 हजार या योजनेतील कामगार कार्यरत झाले आहेत."रोहयो' तील कामगारांनी म्हटले आहे की, आम्ही सर्व नियमांचे आम्ही पालन करतो, पण आम्हाला काम द्या अशी मागणी प्रत्येक ग्राम पंचायतीच्या अधिकाऱ्यांकडे करण्यात येत आहे. 

कोरोना विषाणूला रोखण्यासाठी जिल्ह्या प्रशासनाने 50 दिवसापासून सर्वच कामे बंद ठेवण्यात आली आहेत. त्यामुळे रोजंदारी करणाऱ्यांवर आर्थिक संकट कोसळले आहे. काम नाही,पण पोट चालूच आहे अशी भावना कामगार व्यक्‍त करत आहेत. त्यामुळे आम्हाला काम द्या अशी मागणी ग्राम पंचायतींकडे करण्यात आली आहे."रोहयो' तील काम करण्यात बेळगाव जिल्हा मागील आर्थिक वर्षात अव्वल स्थानी राहिला आहे."रोहयो'तील कामगारांची संख्याही बेळगाव तालुक्‍यात अधिक असून मागील वर्षी 9 हजार कामगार कार्यरत होते. यंदाही यामध्ये वाढ होण्याची शक्‍यता होती. मात्र, लॉकडाउनमुळे मार्च महिन्यापासून कामे बंद करण्यात आली. त्यामुळे एप्रिल महिन्यातही हाताला काम मिळाले नाही. 
अजूनही काही ग्राम पंचायतीमध्ये कामे देण्यास सुरूवात करण्यात आली नाहीत, मात्र "रोहयो'तील कामगार पोटासाठी कामावर हजर झाले आहेत. बेळगाव तालुक्‍यातील 59 ग्राम पंचायतीमध्ये 4 हजार रोहयो कामगार काम करत आहेत. यामध्ये तलाव खोदाई, कृषी तलाव बांधणी, विहिरी खोदाई, शिवारातील सारणीतील गाळ काढणे, नाल्यातील गाळ काढणे, गोठा बांधणे आदी कामे केली जात आहेत. यामुळे या आठवड्यात आणखीन 3 हजार कामगारांना काम देण्याची तयारी ग्राम पंचायतीच्या अधिकाऱ्यांनी केली आहे. परिणामी तालुक्‍यातील सुमारे 8 ते 9 हजार "रोहयो' कामागारांच्या हातांना काम उपलब्ध करून देण्याचे उद्दिष्ट तालुका पंचायतीने ठेवले आहे. 

खबरादीर घेऊन काम उपलब्ध 

लॉकडाऊन सुरू असले तरी सर्व खबरादीर घेऊन रोहयो कामगारांना काम उपलब्ध करून देण्याचे कार्य सुरू आहे. आजपर्यंत बेळगाव तालुक्‍यात 4 हजार कामगार कार्यरत असून पुढील आठ दिवसात तीन ते चार हजार कामगार कामवर हजर होण्याची शक्‍यता आहे. 

राजेंद्र मोरबद 
सहाय्यक संचालक, रहोयो विभाग, तालुका पंचायत.