सांगली : मुख्यमंत्री उद्धव ठाकरे आज सांगली जिल्ह्याच्या दौऱ्यावर आहेत. कोल्हापूर विमानतळावरुन ते सांगली येथील पूरग्रस्त भागात दाखल झाले. दरम्यान सांगलीतील पूरग्रस्त भागांची आज त्यांनी पाहणी केली. पूरग्रस्त भागातील लोकांशी संवाद साधला. दौऱ्यादरम्यान त्यांनी सरकारकडून मदत जाहीर करणार असल्याचे सांगितले. कायमस्वरुपी तोडग्यासाठी कठोर निर्णय घ्यावा लागेल, नागरिकांची पुनर्वसनाची तयारी आहे का? असा सवाल मुख्यमंत्री उद्धव ठाकरे यांनी केला आहे.

दरम्यान मुख्यमंत्र्यांनी पाहणी दौऱ्यानंतर सांगलीत पत्रकार परिषद घेतली. यावेळी त्यांची भेट घेण्यासाठी संभाजी भिडे तिथे उपस्थित होते. काही काळ ते मुख्यमंत्र्यांच्या भेटीच्या प्रतिक्षेत एका खोलीत बसले होते. दरम्यान मुख्यमंत्र्यांची आणि भिडे यांची भेट झाली. मात्र या भेटीत कोणत्याही मुद्द्यांविषयी चर्चा झाली नसल्याची माहिती सुत्रांकडून समजते आहे.