सांगली : गणेशोत्सव जवळ आला असून देशभरातील गणेशभक्तामध्ये आनंदाचे वातावरण आहे. सर्वांनाच गणेशाच्या आगमनाची चाहूल लागली असून अनेक ठिकाणी या उत्सवाची तयारी सुरू झाली आहे. ढोल ताशा पथक, लेझीम पथक, देखावे यांचे रंगीत तालीम आणि सराव सुरू झाले आहेत. तर सांगलीच्या प्रसिद्ध असलेल्या विसावा तरूण मंडळाकडून लेझीमचा सराव सुरू करण्यात आला आहे.

कोरोना काळातल्या दोन वर्षांत गणेशोत्सवामध्ये लोकांना गर्दी करता आली नव्हती. तर मागच्या वर्षी लॉकडाऊन नसल्यामुळे गणेशभक्तांनी गणेशोत्सव मोठ्या जल्लोषात साजरा केला होता. त्यानंतर आता यावर्षीच्या गणेशोत्सवासाठीही भक्तांची जोरदार तयारी सुरू झाली आहे. सांगलीतील लेझीमचा खेळ पाहिला तर तुम्हीही अचंबित व्हाल.

दरम्यान, विसावा मंडळाकडून लेझीम सरावाचे काही व्हिडिओ शेअर करण्यात आले असून हा व्हिडिओ पाहून आपल्याही अंगात उत्साह संचारेल. लहान मुले, मुली, तरूण मुले आणि वयस्कर मंडळीसुद्धा लेझीमच्या सरावामध्ये सामील झाल्याचं या व्हिडिओमध्ये पाहायला मिळत असून नेटकऱ्यांकडून या व्हिडिओला चांगलीच पसंती मिळत आहे.