कुपवाड ः बेडग (ता. मिरज) येथे एक कोल्हा विहिरीत पडला. त्याबाबतची माहिती मिळाल्यानंतर तत्काळ निम्न स्वाक्षरीकर्ता यांच्याकडील बचाव पथक रवाना झाले आणि त्यांनी पिंजरा टाकून त्याला वाचवले. त्यानंतर त्याला नैसर्गिक अधिवासात मुक्त करण्यात आले. वनपरिक्षेत्र अधिकारी यू. स. पाटील यांनी ही माहिती दिली.

हा कोल्हा विहिरीत पडला असल्याची माहिती सचिन कणसे यांनी दिली. बेडग ते मालगाव रस्त्यावरील खरात वस्ती, कणसे मळा येथील विहिरीत तो पडला होता. संभाजी भोसले यांच्या विहिरीत कोल्हा असल्याचे समजताच गावातील लोकही जमा झाले होते. त्यांनी वन विभागाशी संपर्क साधल्यानंतर टीम रवाना झाली आणि त्यांनी यशस्वीपणे त्याला सुरक्षित बाहेर काढण्यात यश मिळवले. या बचाव पथकात वनपरिक्षेत्र अधिकारी युवराज पाटील, मानद वन्यजीव रक्षक अजित पाटील, वनपाल तुषार भोरे, सागर थोरवत, कौशल्या सातपुते, संजीव जोसी, पांडूरंग कांबळे, वनमदूर गावडे आदींनी सहभाग घेतला. उपवनसंरक्षक वन विभाग व सहायक वनसंरक्षक विभागाकडून मार्गदर्शन मिळाल्याचे त्यांनी सांगितले.

सध्या द्राक्ष छाटणी आणि ऊस तोडणी सुरु आहे. त्यामुळे वन्यजीव तेथे भटकू शकतात. लोकांनी त्यांना इजा न करता १९२६ या क्रमांकावर माहिती द्यावी, असे आवाहन श्री. पाटील यांनी केले आहे.