सांगली: सौन्दर्य स्पर्धेत तब्बल चारवेळा प्रथम क्रमांक मिळवलेल्या सांगलीतील (Sangli) ऐश्वर्याचा थाटच वेगळा. दरवर्षी गणेश जयंतीला (Ganesh Jayanti) थाटात माटात इनाम धामणी गावात तिचा वाढदिवस साजरा केला जातो. तिच्या या वाढदिवसाला फक्त घरातीलच नाही तर गावातील नागरीक हजेरी लावतात. ऐश्वर्या ही कोणी मुलगी नसून एक रिक्षा आहे जीचा वाढदिवस खूप उत्साहात साजरा केला जातो.

रिक्षाचालक अशोक मलमे यांची रिक्षा (Aishwarya Auto)म्हणजे गावकऱ्यांसाठी एक संजीवनी आहे. केवळ प्रवास हाच फक्त उद्देश नसून समाजसेवेचे व्रत घेतलेल्या अशोक मलमे यांच्या रिक्षाचा सलग चार वर्षे प्रथम क्रमांक आला. तेव्हापासून त्यांनी रिक्षाचे नाव ऐश्वर्या ठेवले. काल (ता.४) ऐश्वर्याचा सहावा वाढदिवस होता. मलमे आणि त्यांच्या रिक्षाला शुभेच्छा देण्यासाठी गावातील सरपंच आणि गावकरी मोठ्या संख्येने उपस्थित होते. महाराष्ट्रात मलमे यांनी अनेक ठिकाणी सौंदर्य स्पर्धेत सहभाग घेतला आहे.

अशोक मलमे हे गेली तीस वर्ष रिक्षा चालवत आहेत. त्यांनी रिक्षा ही अतिशय सुंदर सजवली आहे. या रिक्षात थोर पुरुषाच्या प्रतिमा, प्रवाश्यांसाठी कुलर, लायटिंग ची सुविधा केली आहे. अशोक मलमे हे गेल्या तीस वर्षापासून अपंग लोकांसाठी मोफत सेवा देत आहेत. याशिवाय वृद्ध लोकांसाठी अर्धे भाडे घेतात.