इस्लामपूर : जिल्हा मध्यवर्ती सहकारी बँक निवडणुकीत वाळवा तालुक्याचे महत्व यावेळीही अधोरेखित झाले आहे. पालकमंत्री व राष्ट्रवादीचे नेते जयंत पाटील यांची भूमिका महत्वपूर्ण ठरणार आहे. वाळवा तालुक्यातून राष्ट्रवादी, काँग्रेस, भाजपा, शिवसेना या पक्षांनी उमेदवार दिले आहेत. त्यामुळे महाविकास आघाडीत राष्ट्रवादी, काँग्रेस व शिवसेना यापैकी वाळवा तालुक्यातून कोणाला संधी मिळणार? याची उत्सुकता आहे. महाडिक गटाने भाजपामधून अर्ज दाखल केले असले तरी `महाडिक गट आणि विषय कट` अशी लढतीची भुमिका नेहमीप्रमाणे ठेवल्याने काही झाले तरी निवडणूक लढवण्याचा पवित्रा घेतला आहे.

विद्यमान संचालकांचे राजकीय पक्ष पाहिले तर राष्ट्रवादीचे ९, काँग्रेसचे ५, शिवसेना १ व भाजपा ६ असे चित्र आहे. गतवर्षी सहकारी संस्थेत राजकारण नको म्हणून भाजपने राष्ट्रवादीसोबत बँकेच्या पायऱ्या चढल्या होत्या. यंदाही भाजपला बरोबर घेण्याची मानसिकता जयंत पाटील यांची होती. मात्र, राज्यातील फॉर्म्युलाप्रमाणे राष्ट्रवादी, काँग्रेस व शिवसेना यांचे पॅनेल करुन भाजपला बँकेत रोखण्यासाठी काँग्रेसचे राज्यमंत्री विश्वजीत कदम आग्रही आहेत.

सध्या तालुक्यात राष्ट्रवादीचे दिलीपतात्या पाटील, बी. के. पाटील, विलासराव शिंदे हे निवडून आलेले संचालक आहेत. ॲड. चिमण डांगे तज्ञ संचालक आहेत. यंदा बी. के. पाटील यांनी अर्ज ठेवलेला नाही. तर दिलीपतात्या पाटील व विलासराव शिंदे यांचे पुत्र वैभव शिंदे, कासेगावचे देवराज पाटील, वाटेगावचे रविंद्र बर्डे, कोरेगावचे व्यंकटराव पाटील, ॲड. चिमण डांगे व उदय पाटील यांनी राष्ट्रवादीकडून अर्ज दाखल केले आहेत. सातपैकी कोणाला संधी देणार याकडे लक्ष आहे. काँग्रेसकडून वैभव पवार, अलकादेवी पवार (इस्लामपूर), संदीप जाधव (येलूर), हिंदूराव वाटेगावकर (बोरगाव), नंदकुमार कुंभार (इस्लामपूर) यांनी अर्ज दाखल आहेत. विद्यमान संचालक मंडळात एकही काँग्रेसचा चेहरा नाही. त्यामुळे मंत्री कदम वाळवा तालुक्याला संधी देणार की थांबायला लावणार याची उत्सुकता आहे. शिवसेनेकडून अशोक माळी (पेठ), मधुकर पाटील (कापूसखेड) हे दोन अर्ज दाखल आहेत.

भाजपकडून राहुल महाडिक, मारुती खोत (बहादूरवाडी), भानूदास मोटे (तांदूळवाडी), सी. बी. पाटील, जयराज पाटील (कामेरी) यांनी अर्ज भरले आहेत. सी. बी. पाटील हे विद्यमान संचालक आहेत. महाडिक यांनी सोसायटी व पतसंस्था गटातून उमेदवारी अर्ज दाखल केला आहे. काही झाले तरी बँकेत जायचेच या तयारीने महाडिक यांनी जिल्हा दौरा केला आहे.

लढतीचे चित्र स्पष्ट नाही...

वाळवा तालुक्यातील लढतीचे चित्र अद्याप स्पष्ट नाही. राहुल महाडिक सोडले तर एकही उमेदवार लढणारच असे ठामपणे सांगत नाही. त्यांची भूमिका त्यांच्या भुमिकेवर अवलंबून आहे. ९ नोव्हेंबरला लढतीचे चित्र स्पष्ट होईल.