कऱ्हाड ः सोन्याचे दर आभाळाची उंची गाठत आहेत. मात्र, त्याच सोन्याला आकार देणाऱ्या, त्याची नक्षीकाम करणाऱ्या जिल्ह्यातील सुमारे पाच हजार पश्‍चिम बंगालच्या कारागिरांसह कुटुंबांवर उपासमारीची वेळ आली आहे. बचत करण्याची अजिबात सवय नसणाऱ्या कुटुंबांना पहिल्या, दुसऱ्या आठवड्यात सोनार व्यावसायिकांनी मदतही केली. मात्र, व्यवसायच ठप्प असल्याने आता त्यांच्याकडूनही मिळणाऱ्या मदतीला मर्यादा आल्या आहेत. 

तीन ते चार दिवसांपूर्वी 40 हजारांच्या आसपास असणाऱ्या सोन्याच्या दराने अचानक 45 हजारांचा टप्पा ओलांडला आहे. सोने दरावर लॉकडाउनचा परिणाम सकारात्मक झाल्याचे जाणकारांचे मत आहे. मात्र, त्याच सोन्याला आकार देणाऱ्या कारागिरांवर मात्र उपासमारीची वेळ आली आहे. जिल्ह्यात पाच हजार कुटुंबांचा उदरनिर्वाहाचा प्रश्न गंभीर बनला आहे. लॉकडाउन आहे, हाताला काम नाही. त्यामुळे आता करायचे काय, असा प्रश्न त्या कारागिरांना सतावतो आहे. एका कुटुंबात किमान सरासरी पाच सदस्य आहेत. त्यामुळे त्यांची संख्या 25 हजारांच्या आसपास जाते. बऱ्यापैकी कारागीर आपल्या कुटुंब कबिल्यासह जिल्ह्याच्या वेगवेगळ्या भागात स्थायिक आहेत. सोन्याचे नक्षीकाम करणे वगळता अन्य कोणताही दुसरा व्यवसाय नाही. त्यामुळे लॉकडाउनच्या काळामध्ये सध्या त्यांची अवस्था अत्यंत बिकट झाली आहे. गुढीपाडव्याचा मुहूर्त कोरडा गेला.


अक्षयतृतीयेच्या (ता.26 एप्रिल) मुहूर्तावर कोरोनाचे संकट आहे. कारागिरांसाठी या दोन्ही सणाला मोठी संधी असते. तेच सण कोरडे जात असल्याने त्यांच्यापुढे करायचे काय, हाच खरा प्रश्न आहे. नक्षी कारागिरांसह सोने आटणीवालेही अडचणीत आहेत. त्यांच्याही हाताला काम नाही. त्यांचाही व्यवसाय पूर्णपणे घटला आहे. त्यावरही शासनाने लक्ष द्यावे, अशी मागणी आहे. 

विलगीकरण कक्षातील डॉक्‍टर, नर्सचा व्हिडीओ सोशल मीडियावर व्हायरल 

Video : देवा सारखी माणसे मला भेटली

खाल्ले तर सारेजण खाऊ...नाहीतर सगळेच उपाशी मरु 

ब्रेकिंग : सातारा जिल्ह्यात दाेन युवकांना कोरोनाची लागण 

 

""बचत केलेल्या पैसा संपला, मालकाकडून उधार मागितले तरी पैसे मिळत नाहीत. एक दिवस कमी जेवतो. काही वेळा जेवत नाही. अशी स्थिती आमच्यावर आली आहे. मालकांनाही मदत करण्याच्या मर्यादा आहेत. सरकारने आमची व्यवस्था येथेच करावी, अथवा सरकारने गावी पाठविण्याची व्यवस्था करावी.'' 
शफीक शेख, सोने नक्षी कारागीर, पश्‍चिम बंगाल, कऱ्हाड