नगरः ""महिला कर्मचाऱ्यांना शारिरिक, मानसिक त्रास देत पदाचा गैरवापर करीत असलेल्या आरोपातील आस्थापना विभागप्रमुख मेहेर लहारे यांच्यावर महापालिकेने निलंबनाची कारवाई करावी. संबंधित प्रकरणाची तातडीने करावी, येत्या पंधरा दिवसांत कारवाई न झाल्यास लहारे यांना शिवसेना स्टाईलने हिसका दाखवावा लागेल,'' असा इशारा शिवसेनेचे उपनेते अनिल राठोड यांनी दिला. 

हेही वाचा - अयोध्येत मंदिर उभारणीचा मुहूर्त ठरला

महिलांवर होणाऱ्या अत्याचाराबाबत शिवसेनेने कायमच आवाज उठविला आहे. परंतु, सत्ताधारी या प्रश्‍नाकडे कानाडोळा करीत आहे. प्रशासनावरील त्यांचा धाक बासनात गुंडाळला असल्याचीही टीका त्यांनी केली. 

नगरमध्ये आयोजित पत्रकार परिषदेत ते बोलत होते. नगरसेवक योगिराज गाडे, बाळासाहेब बोराटे, गिरीश जाधव, अभिषेक भोसले आदी उपस्थित होते. राठोड म्हणाले, ""लहारे हे गेल्या तीन ते चार वर्षांपासून महिलांच्या तक्रारी आहे, अशा अधिकाऱ्यावर का कारवाई होत नाही, कोणते अधिकारी-पदाधिकारी पाठीशी घालण्याचा डाव करतात. एका महिलेचे निनावी तक्रार थेट मुख्यमंत्र्यांकडे जाते, महापालिकेसाठी ही बाब अत्यंत लाजिरवाणी आहे. या प्रकरणामुळे महापालिकेची राज्य पातळीवर बदनामी झाली आहे. लहारेंची नेमणूक नियमाप्रमाणे झाली आहे का? याचीही चौकशी व्हावी. 

महापालिका प्रशासनावरचा उडाला विश्‍वास 
लहारे यांच्या विरोधात यापूर्वीही अनेकदा महिलांना शारीरिक, मानसिक त्रास देण्याबाबत तक्रारी दाखल झाल्या होत्या. परंतु, कारवाईच्या नावाने बोंबच आहे. महापालिकेतील अधिकारी, पदाधिकारी हा प्रश्‍न जाणीवपूर्वक आयुक्तांकडे पोहचू देत नाही. लहारेंसारख्या पदाचा गैरवापर करणाऱ्या अधिकाऱ्यावर काहीच कारवाई होत नसल्याने महापालिका प्रशासनावरचा विश्‍वास उडाला असल्याचे राठोड यांनी स्पष्ट केले.

महिलांनी घाबरू नये 

महापालिकेतील महिला कर्मचाऱ्यांनी अजिबात घाबरण्याचे काम नाही. शिवसेना अशा लोकांचा बंदोबस्त करीन. महिला संघटनांनी अशा लोकांची हयगय करता कामा नये. लहारे यांच्या सारख्यावर कारवाई झाली असती. तर एका महिलेवर मुख्यमंत्र्यांकडे तक्रार करण्याची वेळ आली नसती. परंतु, आता नगरविकास मंत्री एकनाथ शिंदे यांच्या कानावर हा विषय घालणार आहे. कठोर कारवाईची मागणी करणार असल्याचेही राठोड यांनी नमूद केले.