बेळगाव - सीमाप्रश्न कोण सोडविणार आहे, न्यायालय की तू ?असे विचारत महाराष्ट्र एकीकरण युवा समितीचे अध्यक्ष शुभम शेळके यांना चौकशीसाठी बोलावून पोलिसांकडून दादागिरी करण्यात येत आहे. शेळके यांना मार्केट पोलीस ठाण्यात बोलावून दोन तासापेक्षा जास्त काळ बसवून ठेवण्यात आले आहे. या प्रकाराबाबत मराठी भाषिकांमधून तीव्र नाराजी व्यक्त होत आहे.

कर्नाटकी पोलिसांचा पोटशूळ

गेल्या काही दिसवांपासून मराठी भाषिकांवर विविध प्रकारे अन्याय करू पाहणाऱ्या कर्नाटकी पोलिसांनी महाराष्ट्र एकीकरण युवा समितीच्या अध्यक्षाना अटक करण्यासाठी प्रयत्न सुरू केले आहेत.

वाचा -  पोलिसांनी लढविली नामी शक्कल; डिस्कच्या क्रमांकावरून आरोपी जाळ्यात

शुभम शेळके यांनी युवा समितीच्या माध्यमातून सीमाप्रश्नी आणि मराठी भाषिकांवर होणाऱ्या अन्यायाबाबत आवाज उठविण्यास सुरुवात केली आहे त्यामुळे पोटशूळ उठलेल्या कर्नाटकी पोलिसांनी शुभम शेळके यांना दोन तासांहून अधिकवेळ पोलीस स्थानकात बसवून ठेवले आहे. तसेच यापुढे सीमाप्रश्नी आवाज चालणार नाही अशी धमकी दिली जात असून पोलीस स्थानकासमोर युवा कार्यकर्त्यानी गर्दी करण्यास सुरवात केली आहे. युवा समितीच्यावतीने आज सकाळी बॅ नाथ पै चौकात शिवसेना प्रमुख बाळासाहेब ठाकरे यांना अभिवादन करण्यात आले त्यानंतर शेळके यांना मार्केट पोलीस स्थानकात बसवून ठेवण्यात आले आहे.                                                 

बेळगावसह संयुक्त महाराष्ट्र हेच ध्येय आणि अंतिम लक्ष आहे त्यामुळे पोलिसांनी कितीही वेळ पोलीस स्थानकात बसविले तरी घाबरणार नाही शेवटी विजय आपलाच आहे                     शुभम शेळके, अध्यक्ष महाराष्ट्र एकीकरण युवा समिती