सोलापूर : सोलापूर जिल्ह्यातील दूध उत्पादक शेतकऱ्यांना दिलासा देण्यासाठी सोलापूर जिल्हा सहकारी दूध उत्पादक व प्रक्रिया संघाच्यावतीने दूध खरेदी दरात दोन रुपयांची वाढ करण्यात आली आहे. खरेदी दर आता 31 रुपये करण्यात आला असल्याची माहिती दूध संघाचे अध्यक्ष तथा आमदार प्रशांत परिचारक यांनी दिली आहे. 
हेही वाचा - सोलापूर जिल्ह्यातील या गावात सापडले "विरगळ' 
सलग दोन वर्षे पडलेला दुष्काळ, जिल्ह्यात आलेला महापूर आणि त्यानंतर ऑक्‍टोबरमध्ये झालेली अतिवृष्टी यामुळे जिल्ह्यातील शेतकरी आर्थिकदृष्ट्या अडचणीत सापडला आहे. जिल्हा दूध संघाने शेतकरी केंद्रबिंदू मानून आजपर्यंत काम केले असून अडचणीतील शेतकऱ्यांना आर्थिक मदतीचा दिलासा देण्यासाठी दूध संघाने खरेदी दरात दोन रुपयांची वाढ केली असल्याची माहिती आमदार परिचारक यांनी दिली. दूध संघाच्या सुधारित खरेदी दराची अंमलबजावणी 11 जानेवारीपासून सुरू झाली आहे. सोलापूर जिल्ह्यातील दूध उत्पादक शेतकऱ्यांनी या वाढीव दराचा लाभ घ्यावा, जिल्हा दूध संघालाच दूध पुरवठा करावा असे आवाहनही आमदार परिचारक यांनी केले आहे.