सोलापूर : जिल्हा परिषदेच्या अध्यक्ष व उपाध्यक्ष निवडीत बंडखोरी करणारे राष्ट्रवादीचे सहा सदस्य आणि कॉंग्रेसचे तीन सदस्य यांच्या अपात्रतेबाबत आज सुनावणी झाली. या प्रकरणाची पुढील सुनावणी सोमवारी (ता. 13) दुपारी 1 वाजता होणार आहे. मंगळवारी (ता. 14) दुपारी 2 वाजता जिल्हा परिषदेच्या विषय समित्यांच्या सभापतींच्या निवडी होणार आहेत. शितलादेवी मोहिते-पाटील, स्वरूपाराणी मोहिते-पाटील, अरुण तोडकर, गणेश पाटील, सुनंदा फुले आणि मंगल वाघमोडे माळशिरस तालुक्‍यातील राष्ट्रवादीच्या या सहा सदस्य व अक्कलकोट तालुक्‍यातील कॉंग्रेसचे सदस्य शिवानंद पाटील, मल्लिकार्जुन पाटील आणि शिलवंती भासगी या तीन सदस्यांनी अध्यक्ष व उपाध्यक्ष निवडीत राष्ट्रवादीच्या विरोधात मतदान केले आहे. या सदस्यांना अपात्र करावे अशी मागणी राष्ट्रवादीचे गटनेते तथा राष्ट्रवादीचे जिल्हाध्यक्ष बळिराम साठे व कॉंग्रेसचे गटनेते संजय गायकवाड यांनी जिल्हाधिकारी डॉ. राजेंद्र भोसले यांच्याकडे केली आहे. 
हेही वाचा - सामंतांना पालकमंत्रीपद दिले पण... 
या मागणीवर आज डॉ. भोसले यांच्याकडे सुनावणी झाली असून म्हणणे मांडण्यासाठी सदस्यांनी पुढील तारखेची मागणी केली आहे. या प्रकरणाची सुनावणी आता सोमवारी होणार आहे. जिल्हाधिकारी कार्यालयात होणाऱ्या या सुनावणीसाठी आज बहुतांश सर्व सदस्य उपस्थित होते. गैरहजर असलेल्या सदस्यांनी आपले म्हणणे वकिलामार्फत दिले आहे. जिल्हा परिषद अध्यक्ष व उपाध्यक्ष निवडीत राष्ट्रवादी, शिवसेना व कॉंग्रेसची सदस्यसंख्या असूनही फक्त या तिघांमध्ये योग्य ताळमेळ नसल्याने अध्यक्षपदाचे राष्ट्रवादीचे उमेदवार त्रिभुवन धाईंजे व उपाध्यक्ष पदाचे उमेदवार बाळराजे पाटील यांचा पराभव झाला होता. विषय समिती सभापतींच्या निवडीत पुन्हा तशीच धोकेबाजी होऊ नये म्हणून सभापती निवडीच्या पार्श्‍वभूमीवर राष्ट्रवादीचे गटनेते बळिराम साठे व कॉंग्रेसचे गटनेते संजय गायकवाड यांनी आजच आपल्या सदस्यांना व्हिप बजावला आहे. 
हेही वाचा - स्वच्छ नगरसाठी "मोठे साहेब'च मैदानात 
शिवसेना कोणासोबत? 
जिल्हा परिषदेत शिवसेनेचे एकूण पाच सदस्य आहेत. त्यातील चार सदस्य हे करमाळ्याचे माजी आमदार नारायण पाटील यांचे समर्थक आहेत. पाचवे सदस्य अमर पाटील हे दक्षिण सोलापूर तालुक्‍यातील आहेत. जिल्हा परिषद अध्यक्ष व उपाध्यक्ष निवडीत पाच पैकी अमर पाटील हे एकमेव सदस्य महाविकास आघाडीसोबत राहिले आहेत. करमाळा तालुक्‍यातील शिवसेनेच्या चारही सदस्यांनी भाजप व समविचारी आघाडीची साथ दिली. शिवसेनेच्या गटनेत्या सविताराजे भोसले यांचाच समावेश त्या चार सदस्यांमध्ये असलेल्या जिल्हा परिषदेतील शिवसैनिक कोण? राज्यात कॉंग्रेस-राष्ट्रवादीसोबत सत्तेत असलेली शिवसेना सोलापूर जिल्हा परिषदेत भाजप सोबत की कॉंग्रेस-राष्ट्रवादीसोबत हा प्रश्‍न अद्यापही गुलदस्त्यात राहिला आहे.