सोलापूर ः जिल्हा परिषदेचे अध्यक्ष-उपाध्यक्षपद काबीज केल्यानंतर 14 जानेवारीला होणाऱ्या विषय समित्यांच्या निवडीला भाजप-समविचारी आघाडीने प्राधान्य दिले आहे. काहीही झाले तरी ही एकी अशीच कायम ठेवत विषय समित्यांचे सभापतिपदही आपल्याच पारड्यात पाडून घेण्याची तयारी त्यांनी सुरू केली आहे. त्याचाच एक भाग म्हणून भाजप-समविचारी आघाडीच्या सदस्यांची बैठक उद्या (गुरुवारी) सकाळी 11 वाजता "नंदादीप' या अध्यक्षांच्या बंगल्यावर होणार आहे. 

हेही वाचा ः सोलापुरात कॉंग्रेसच्या "या' नेत्याने का केले राजीनाम्याचे नाटक? 

सोलापूर जिल्हा परिषदेत राष्ट्रवादी सर्वांत मोठा पक्ष असूनही त्यांना अध्यक्ष-उपाध्यक्ष निवडणुकीत महाविकास आघाडीच्या माध्यमातून सत्ता स्थापन करण्यात अडचणी निर्माण झाल्या होत्या. काहीही झाले तरी अध्यक्ष-उपाध्यक्ष आमचाच होणार अशी फुशारकी मिरविणाऱ्या स्थानिक नेत्यांना निवडणुकीत चांगलाच धक्का बसला. भाजप-समविचारी आघाडीने कॉंग्रेसच्या सदस्यांना आपल्या बाजूला करण्यात यश मिळविले होते. त्यामुळेच या दोन्ही निवडणुकीत भाजप-समविचारींचे उमेदवार विजयी झाले. विजयाचा हा सिलसिला असाच कायम ठेवण्याचा प्रयत्न त्यांच्या नेत्यांकडून केला जाणार आहे. अध्यक्षाच्या निवडणुकीत 37 मते आपल्या बाजूने वळविण्यात भाजप-समविचारी आघाडीला यश आले होते. आता 14 जानेवारीला होणाऱ्या विषय समित्यांच्या निवडीवेळी या मतांमध्ये वाढ होईल, असे भाजप-समविचारी आघाडीच्या नेत्यांकडून बोलून दाखविले जात आहे. 

हेही वाचा ः छानच की...अपघातविहरीत सेवेसाठी लालपरीची चतुःसुत्री 

दुसरीकडे महाविकास आघाडी माळशिरस तालुक्‍यात राष्ट्रवादी कॉंग्रेसच्या सहा सदस्यांचे सदस्यत्व रद्द करण्यासाठी प्रयत्न करत आहेत. त्याची सुनावणी उद्या (गुरुवारी) जिल्हाधिकाऱ्यांकडे होणार आहे. राष्ट्रवादी सदस्यांचे सदस्यत्व रद्द करण्यासाठी तर भाजप-समविचारी आघाडीचे नेते विषय समित्यांवर पुन्हा आपलेच वर्चस्व कसे राखता येईल, यासाठी प्रयत्न करत असल्याचे स्पष्टपणे दिसत आहे. जिल्हाधिकाऱ्यांकडे असलेल्या सुनावणीमध्ये काय होते, यावरही बरीच राजकीय समीकरणे अवलंबून राहणार आहेत. 

कोणत्या तालुक्‍याची संधी हुकणार? 
भाजप-समविचारी आघाडीच्या उद्या (गुरुवारी) होणाऱ्या बैठकीमध्ये 14 जानेवारीला होणाऱ्या विषय समित्यांच्या निवडीबाबत चर्चा होणार आहे. अध्यक्ष-उपाध्यक्ष निवडीवेळी जी चर्चा झाली होती तीच चर्चा पुन्हा गुरुवारच्या बैठकीत होणार का? याबाबतही उत्सुकता आहे. अध्यक्ष-उपाध्यक्ष निवडीवेळी भाजपच्या चिन्हावर निवडून आलेल्या व राष्ट्रवादीशी फारकत घेतलेल्या माळशिरसच्या सहा सदस्यांना या निवडीमध्ये कोणत्याही प्रकारचे पद न देण्याच्या विषयावर चर्चा झाली होती. पण, भाजपच्या काही सदस्यांना पदाची अपेक्षा लागली आहे. त्यांनी जर पदाची मागणी केली तर तो तिढा सोडवायचा कसा? याबाबतही या बैठकीत चर्चा होण्याची शक्‍यता वर्तविली जात आहे. शेवटी भाजपला वगळून इतरांना पदाधिकारी करण्याचा निर्णय 14 जानेवारीलाच मार्गी लागण्याची शक्‍यता आहे. त्यामुळे सांगोला, मोहोळ, पंढरपूर या तालुक्‍यांशिवाय अक्कलकोट की बार्शीला पद मिळते हे पाहणे औत्सुक्‍याचे आहे.