सोलापूर : नववर्षाच्या पूर्वसंध्येला म्हणजेच ३१ डिसेंबर रोजी विक्री करण्याच्या हेतूने साठा केलेला गोवा बनावटीचा तीन लाख ८५ हजार रुपयांचा मद्यसाठा राज्य उत्पादन शुल्क विभागाने जप्त केला आहे. या पथकाने शहाजी गायकवाड (रा. गायकवाड वस्ती, टाकळी सिकंदर, ता. मोहोळ) याने शौचालयात लपविलेल्या भारतीय बनावटीच्या गोवानिर्मित विदेशी दारुच्या ३०० बाटल्या व आकाश धनंजय गवळी याच्या घरातून ६०० बाटल्या जप्त करुन दोघांना अटक केली आहे.

मोहोळ तालुक्यातील टाकळी सिकंदर येथे फक्त गोवा राज्यात विक्रीसाठी असलेला मद्यसाठा गावात विक्री होत असल्याची खबर राज्य उत्पादन शुल्क विभागाला मिळाली होती. त्यानुसार सोमवारी (ता. ३०) अधीक्षक भाग्यश्री जाधव, उपअधीक्षक एस. आर. पाटील यांच्या मार्गदर्शनाखालील पथकाने आकाश गवळी (वय २६) याच्या घरी छापा टाकला. त्यावेळी ५० बॉक्समध्ये ७४० मिलीच्या ६०० बाटल्या आढळून आल्या. त्याच्याकडे अधिक चौकशी केली असता, त्याने गावातील शहाजी गायकवाड यालाही २५ बॉक्स (३०० बाटल्या) विकल्याचे सांगितले. त्यानुसार राज्य उत्पादन शुल्क विभागाच्या पथकाने गायकवाड वस्तीवर धाव घेतली. त्यावेळी त्याने शौचालयात मद्यसाठा लपवून ठेवल्याचे दिसले. दोघांनाही अटक करून त्यांच्याविरुद्ध महाराष्ट्र दारुबंदी अधिनियम १९४९चे कलम ६५(ई), ८०, ८१, ८३, ९०, १०३, १०८ प्रमाणे गुन्हा दाखल करण्यात आला आहे.

लाखोंचा शासनाचा महसूल बुडवून ३१ डिसेंबरच्या निमित्ताने मद्यविक्रीचा कट राज्य उत्पादन शुल्क विभागाच्या पथकाने उधळून लावला आहे. ही कामगिरी अधीक्षक भाग्यश्री जाधव, उपअधीक्षक शिवाजी पाटील यांच्या मार्गदर्शनाखाली निरीक्षक जगन्नाथ पाटील, दुय्यम निरीक्षक धनाजी पोवार, रमेश कोलते, अंजली सरवदे, सहायक दुय्यम निरीक्षक सज्जन चव्हाण, जवान चेतन व्हनगुंटी, अनिल पांढरे, शोएब बेगमपुरे, वसंत राठोड यांच्या पथकाने पार पाडली.