सोलापूर : शाळेमार्फत वरिष्ठ वेतनश्रेणीसाठी एका शिक्षकाचा प्रस्ताव माध्यमिक शिक्षण विभागाकडे पाठविला होता. ते काम करून देण्यासाठी कार्यालयातील वरिष्ठ सहाय्यक घनश्याम अंकुश मस्के याने तक्रारदाराकडे ४० हजाराची लाच मागितली. तडजोडीअंती ३५ हजार रुपये देण्याचे ठरले आणि त्यातील पहिला हप्ता २० हजार रुपये स्वीकारताना मस्केला लाचलुचपत प्रतिबंधक विभागाच्या अधिकाऱ्यांनी त्याला रंगेहाथ पकडले. मस्केविरुद्ध सदर बझार पोलिसांत गुन्हा दाखल झाला असून त्याला उद्या (शुक्रवारी) न्यायालयात हजर केले जाणार आहे.

तक्रारदार शिक्षकाची सेवा २४ वर्षे पूर्ण झाल्याने त्यांना वरिष्ठ निवडश्रेणी तथा वेतनश्रेणी मिळणार होती. तसा प्रस्ताव शाळेने माध्यमिक शिक्षणाधिकाऱ्यांकडे पाठविला होता. २५ ऑक्टोबर २०२३ रोजी पाठविलेल्या प्रस्तावावर अजूनपर्यंत कोणताही निर्णय झाला नव्हता. काम वेळेत व्हावे म्हणून तक्रारदाराने पाच हजार रुपये यापूर्वीच दिले होते. त्यानंतरही मस्के याने ३० हजार रुपयांची लाच मागितली होती. मान्यतेसाठी वरिष्ठांकडे प्रस्ताव सादर करण्यासाठी त्याने गुरुवारी (ता. ६) २० हजार रुपयांची लाच घेतली.

कार्यालयातच मस्के याने रक्कम स्वीकारली, त्याचवेळी ही कारवाई झाली. वरिष्ठ पोलिस निरीक्षक उमाकांत महाडिक यांच्या मार्गदर्शनाखाली पोलिस निरीक्षक गणेश पिंगुवाले यांच्या नेतृत्वात सहायक फौजदार श्री. कोळी, पोलिस नाईक संतोष नरोटे, गजानन किणगी, राहुल गायकवाड यांच्या पथकाने ही कारवाई पार पाडली.

कामकाज ऑनलाइन, तरीपण कार्यालयात गर्दी

माध्यमिक शिक्षण विभागाने काही सेवा ऑनलाइन केल्याचा काही दिवसांपूर्वी गवगवा झाला. शिक्षकांना आता माध्यमिक शिक्षणाधिकारी कार्यालयात हेलपाटे मारावे लागणार नाहीत, अशी ग्वाही देखील शिक्षणाधिकाऱ्यांनी दिली. तरीपण, दररोज या कार्यालयात शिक्षकांसह विविध शैक्षणिक संस्थांमधील प्रतिनिधींची गर्दी दिसतेच, अशी वस्तुस्थिती आहे.

फाइलमध्ये रक्कम आणायला सांगितली

माध्यमिक शिक्षण विभागाच्या कार्यालयात नेहमीप्रमाणे काही लोक थांबून होते. त्यामुळे कोणीतरी रक्कम घेताना पाहील म्हणून मस्के याने तक्रारदाराला त्यांच्याच फाइलमध्ये ठेवून पैसे आणायला सांगितले. फाइलमध्ये असलेली रक्कम स्वीकारून खिशात घालताना त्या ठिकाणी दबा धरून थांबलेल्या लाचलुचपत प्रतिबंधक विभागाच्या अधिकाऱ्यांनी त्याला रंगेहाथ पकडले.