सोलापूर : आषाढ मासानिमित्त कर्णिक नगरात म्हशी पळविण्याचा कार्यक्रम पार पडला. परंतु, कोरोनाच्या (Covod-19) पार्श्‍वभूमीवर शनिवार, रविवारी संपूर्ण दुकाने बंद ठेवण्याचे आदेश असून जमावबंदीही लागू आहे. तरीही, कोरोना नियम पायदळी तुडवत हा कार्यक्रम घेण्यात आला. या प्रकरणाची पोलिसांनी गंभीर दखल घेत पोलिस उपायुक्‍त डॉ. वैशाली कडूकर (Deputy Commissioner of Police Dr. Vaishali Kadukar) यांच्या आदेशानुसार आयोजकांवर जेलरोड पोलिसांत गुन्हा दाखल झाला आहे. (A case has been registered against ten people for breaking the rules and running a buffalo race-ssd73)

कोरोनामुळे शहरातील निर्बंध शिथिल होत नसून नागरिकांनी कोटेकोरपणे नियमांचे पानल केल्यास आगामी काळात निश्‍चितपणे निर्बंध उठतील, असा विश्‍वास पोलिसांनी तीन दिवसांपूर्वीच आयोजकांसमोर व्यक्‍त केला होता. मागील वर्षीप्रमाणेच यंदाही उत्सव साध्या पद्धतीने साजरा करा, असेही बजावले होते. त्या वेळी सर्वांनी सकारात्मक प्रतिसाद दिला. तरीही, रविवारी बऱ्याचजणांनी अचानक नियबाह्य पद्धतीने म्हशी पळविण्याचा कार्यक्रम घेतला. आयोजकांसह त्या ठिकाणी उपस्थितांविरुद्ध जेलरोड पोलिसांत गुन्हा दाखल करण्यात येत आहे. दहाजणांविरुद्ध रात्री उशिरापर्यंत गुन्हा दाखल झाला होता. त्यांच्या म्हशीही पोलिसांनी ताब्यात घ्याव्यात, असे आदेश पोलिस उपायुक्‍त डॉ. कडूकर यांनी दिले आहेत. जेलरोड पोलिस ठाण्याचे वरिष्ठ पोलिस निरीक्षक धनंजय शिंगाडे यांच्या मार्गदर्शनाखाली पुढील तपास सुरू आहे. तत्पूर्वी, कर्णिक नगराचा काही भाग एमआयडीसी तर काही परिसर जेलरोड पोलिस ठाण्याच्या हद्दीत येतो. त्यामुळे सुरवातीला नेमका गुन्हा कोणी दाखल करायचा, या वादात गुन्हा दाखल करण्यास विलंब झाल्याची चर्चा आहे.

आषाढ मासानिमित्त म्हशी पळविण्याचा कार्यक्रम घेता येणार नाही, असे बजावून देखील काहींनी जाणीवपूर्वक कोरोना नियमांचे उल्लंघन केले आहे. संबंधितांवर गुन्हे दाखल करण्याचे आदेश दिले आहेत.

- डॉ. वैशाली कडूकर, पोलिस उपायुक्‍त

यांच्याविरुद्ध गुन्हा दाखल

लक्ष्मण माणिक गड्यप्पा (रा. मस्तान हॉटेलमागे, अशोक चौक), राजू रामचंद्र भास्कर (रा. शनि मंदिरशेजारी, कुमठा नाका), सुरेश माणिक कलागते, विकास बाबूराव कलागते (रा. गवळी वाडा, मुस्लिम पाच्छा पेठ), गणेश बंडू खंडेराव (रा. गांधी नगर, जुना अक्‍कलकोट नाका), वैभव दत्तात्रय बहिरवाडे (रा. भगवान नगर झोपडपट्टी), शुभम अशोक कलागते (रा. तेलंगी पाच्छा पेठ), दिलीप राजेंद्र भास्कर, अभिजित राजेंद्र भास्कर (दोघेही रा. कुमठा नाका), यशवंत अंबादास बडवणे (रा. अशोक चौक) यांच्याविरुद्ध जेलरोड पोलिसांत गुन्हा दाखल झाला आहे.