सोलापूरः अजस्त्र जेसीबी मशिनने काही मिनिटात सर्व परिसर अगदी झाडाझुडपासहीत सपाट केला....अन्नाच्या शोधात गेलेली ती कुत्री तेथे आली.......मोठ्या आवाजात ती विव्हळत होती अन डोळ्यातील मुक्‍या भावनेने तीने तरुणाच्या मनाला पाझर फोडला......आईची आर्त हाक त्याला समजली.....तब्बल दिड तासाच्या प्रयत्नानंतर अखेर तीचे आईपण जिंकल्याचे पाहून प्रत्येक जण अवाक झाला......हा प्रसंग प्रत्येकाच्या मनात कोरला गेला. 

हेही वाचा :  एकवीस वर्षानंतर पहाटगाण्याशिवाय दिवाळी 
 
आई ही जगात मानव किंवा प्राण्यात असो तीचे प्रेम सर्वत्र व्यापून उरलेले असते. तीने तीच्या बाळांवर केलेल्या प्रेम हे सर्वात मोठे असते. मुकी जनावरांची भाषा माणसाला कळत नाही. पण त्या पलिकडे आईची पिल्लाबद्दलची ओढ भाषेच्या सिमा ओलांडणारी असते. तीला भाषेत बांधता येत नाही. प्रत्येकाला या जगातील आई असणाऱ्या जीवाला मदत केलीच पाहीजे हाच खरा धर्म आहे हे मुके प्राणी माणसाला भाषा समजत नसली तरी बोलून दाखवतात. हे आईपण समजून घेण्यासाठी आपले ह्दय संवेदनशील असावे लागते याचा अनुभव जुळे सोलापुरात पाहण्यास मिळाला. 

जुळे सोलापूरातील गीता नगर भागात एका प्लॉटची मोकळी जागा आहे. काही कामासाठी दुपारी बाराच्या सुमारास तेथे जेसीबी आणले. तेथे वाढलेली दिड ते दोन फुट झुडूपे व जमीनीची सफाईचे काम सुरू झाले. जेसीबीसाठी हे काम अगदी सोपे होते. जेसीबीने सर्व झुडपे व काढलेली माती एका बाजूला लावली. काम आटोपल्यानंतर जेसीबी तेथून निघून गेले. अन्नाच्या शोधात गेलेली कुत्री तेथे आली. तेथे सर्व जमीनीत झालेला बदल पाहून ती मोठ्याने विव्हळू लागली. तीच्या विव्हळण्याचे कारण काही समजत नव्हते. मात्र तेथे असलेल्या संतोष नावाच्या तरुणासमोर ती विव्हळून सांगण्याचा केवीलवाणा प्रयत्न करीत होती. ती तोंडाने काही जागेच्या ठिकाणी खुणाही करत होती. तेव्हा या तरुणाला तीच्या विव्हळण्याने या ठिकाणी काही तरी आहे हे समजून आले. 

हेही वाचाः शेजारचे गेले दवाखान्यात, तितक्‍यात महाविद्यालयीन तरुणाने चोरले 75 ग्रॅम सोन्याचे दागिने 

त्याने एक काठी घेवून प्रयत्न सुरू केले. त्याच्या मदतीला आणखी एक तरुण स्टंप घेऊन आला. हे तरुण काही कुत्रीने दाखवलेल्या जागावर शोध घेत होते. जागा सपाट झाल्याने काही सापडत नव्हते. ते खोदू लागल्यानंतर कुत्री त्याच्या भोवती फिरुन पुन्हा पुन्हा त्यांना मुक्‍या भावनेने तीची आईपणाची साद घालत होती. अखेर थोडेसे खोदल्यानंतर त्या खड्ड्यात चक्क तीची पाच पिल्ले दिसुन आली. कुत्रीने केलेल्या खड्ड्यामुळे हे पिल्ले जमीनीच्या खाली सुरक्षीत होते. जेसीबी फक्त वरच्या बाजुने फिरला होता. ती तशीच पिल्ल्याच्या जवळ गेली. तीने पिलांना हलवले तर ती जीवंत होती. तीने आधी एकेक पिलू तोंडात पकडून एक गाडीखाली घेऊन गेली. एक तास चाललेल्या या प्रकाराकडे परिसरातील नागरिक देखील चकीत होऊन पाहत होते. आईचे प्रेम व मायेचा हा मृत्युवर मात देणारा प्रसंग आईपणाचा नवा प्रत्यय देणारा ठरला.