सोलापूर : कोरोनामुक्‍त (Covid-19) गावांमध्ये आठवी ते बारावीचे ऑफलाइन वर्ग सुरू करण्यास परवानगी आहे. तरीही, सोलापूर जिल्ह्यातील 900 कोरोनामुक्‍त गावांपैकी केवळ 350 गावांमधील 238 शाळाच (School) ऑफलाइन सुरू आहेत. पालकांनी त्यांच्या जबाबदारीवर मुलांना शाळेत पाठवावे, अशी भूमिका शिक्षण विभागाने (Education) घेतल्याने आठवी ते बारावीतील एकूण अडीच लाख विद्यार्थ्यांपैकी केवळ 14 हजार 259 विद्यार्थीच शाळेत हजर राहात असल्याचे विदारक चित्र समोर आले आहे.

राज्यात आठवी ते बारावीच्या 46 हजार 365 शाळा आहेत. त्या शाळांमधील विद्यार्थ्यांची एकूण संख्या एक कोटी तीन लाख सात हजार 457 एवढी आहे. कोरोनाचा धोका लक्षात घेऊन शालेय शिक्षण विभागाने पहिली ते सातवीपर्यंतच्या शाळा सुरू करण्याचा निर्णय अजूनही घेतलेला नाही. परंतु, त्यावरील वर्ग सुरू करण्याचा अधिकार जिल्हाधिकाऱ्यांना (जिल्हा आपत्ती व्यवस्थापन प्रमुख) दिला आहे. जिल्हा परिषदेचे मुख्य कार्यकारी अधिकारी, शिक्षणाधिकाऱ्यांच्या माध्यमातून आठवी ते बारावीचे ऑफलाइन वर्ग सुरू झाले. त्यावेळी विद्यार्थ्यांच्या भवितव्याचा विचार करून विशेषत: दहावी-बारावीचे वर्ग सुरू करण्यास सर्वाधिक प्राधान्य दिले. कोरोनामुक्‍त गावांमध्ये शाळा सुरू करण्याचा अधिकार संबंधित शाळांच्या मुख्याध्यापकांवर सोपविला. मात्र, कोरोनाच्या तिसऱ्या लाटेची भीती असल्याने मुख्याध्यापकांनी मुलांच्या पालकांकडून संमतिपत्र घ्यायला सुरवात केली. दुसरीकडे, कोरोनामुक्‍त गाव झाले, परंतु पुन्हा एखादा रुग्ण आढळला तर रिस्क नको म्हणून अजूनही त्या गावांमध्ये ऑफलाइन शाळा सुरू करण्याचा निर्णय झालेला नाही. ग्रामीण भागातील बहुतेक मुलांकडे अँड्राईड मोबाईल नाहीत, नेटवर्कचा अडथळा असल्याने ऑनलाइन शिक्षणापासूनही ते विद्यार्थी दूर आहेत. शिक्षणाच्या प्रवाहापासून कोसो दूर गेलेल्या मुलांमध्ये शैक्षणिक गोडी निर्माण करावी लागणार आहे. या पार्श्‍वभूमीवर जिल्हा परिषदेचे मुख्य कार्यकारी अधिकारी दिलीप स्वामी हे सोमवारी निर्णय घेणार आहेत.

आठवी ते बारावीच्या शाळांची स्थिती

• कोरोनामुक्‍त अंदाजित गावे : 900

• एकूण शाळा : 1,087

• शाळांमधील विद्यार्थी : 2,51,942

• सध्या सुरू असलेल्या शाळा : 238

• शाळांमधील उपस्थिती : 14,259

जिल्ह्यातील जवळपास नऊशे गावे कोरोनामुक्‍त झाली असून दहापेक्षा अधिक रुग्ण आढळणाऱ्या गावांमध्ये कडक निर्बंध लावून प्रादुर्भाव कमी करण्याचा प्रयत्न सुरू आहे. कोरोनामुक्‍त गावांमध्ये ऑफलाइन शाळा सुरू करण्यासंदर्भात गटशिक्षणाधिकारी गावनिहाय आढावा घेतील. सोमवारी त्यावर निर्णय होईल.

- दिलीप स्वामी, मुख्य कार्यकारी अधिकारी, जिल्हा परिषद, सोलापूर