सोलापूर : बंगळरू येथे अत्यावश्‍यक वस्तूंची वाहतूक वेगाने व सुलभ होण्यासाठी सोलापूर जिल्ह्यातील बाळे आणि बंगळरू येथील नेलमंगला दरम्यान रोल- ऑन- रोल (रो-रो) सेवा सुरू करण्यास रेल्वे मंत्रालयाने मान्यता दिली आहे. आता दोन्ही ठिकाणी ट्रक चढविण्यासाठी व उतरविण्यासाठी रॅम्प तयार करण्याचे काम हाती घेण्यात आले आहे. आता या सेवेला प्रत्यक्षात 20 एप्रिलनंतर सुरुवात होईल, असे वरिष्ठ वाणिज्य व्यवस्थापक प्रदिप हिरडे यांनी सांगितले. 

हेही नक्‍की वाचा : मोठी बातमी ! ठाकरे सरकार काढणार 60 हजार कोटींचे कर्ज 

रो-रो ही सेवा मध्य रेल्वे, दक्षिण मध्य रेल्वे आणि दक्षिण-पश्‍चिम रेल्वे या तीन विभागांत सुरू होणार आहे. प्रत्येक फेरीला सहा दिवस लागणार असून वाडी व धर्मावरममार्गे ही वाहतूक केली जाणार आहे. रेल्वे राज्यमंत्री सुरेश सी. अंगडी यांच्या संकल्पनेतून ही सेवा सुरू होत आहे. प्रयोग यशस्वी झाल्यानंतर आवश्‍यक त्या राज्यांत ही सेवा पोचविली जाणार असल्याचे त्यांनी स्पष्ट केले. एका मालगाडीत 43 खुल्या वॅगन असतील. मात्र, त्या गाडीच्या आकारानुसार 43हून अधिक ट्रक किंवा लॉरी घेऊन जाता येणार आहे. प्रत्येक ट्रकला 30 टन माल वाहतुकीस परवानगी देण्यात आली असून प्रत्येक ट्रकला टनाला दोन हजार 700 रुपयांचे भाडे आकारले जाणार आहे. ट्रकसमवेत जाणाऱ्या ड्रायव्हर आणि दुसऱ्या व्यक्‍तीस प्रवासासाठी द्वितीय श्रेणीची तिकिटे खरेदी करावी लागणार आहेत. कोकण रेल्वे कॉर्पोरेशन लिमिटेड (केआरसीएल) ही रो-रो सेवा सुरत्कल आणि कोलाड (मुंबईपासून 143 किमी) दरम्यान चालू आहे. प्रत्येक खेपेस चार लाख रुपये देऊन केआरसीएलकडून भाडेतत्त्वावर एक रेक घेण्यात आला आहे. या सेवेमुळे सोलापूर जिल्ह्यातील उद्योजक आणि शेतकाऱ्यांसाठी जलद आणि सुरक्षित वाहतुकीची सुविधा उपलब्ध होणार आहे. 

हेही नक्‍की वाचा : सकाळ ब्रेकिंग ! दहावीच्या भुगोल पेपरचा वाढला पेच 

महत्त्वाचे मुद्दे... 

• 43हून अधिक ट्रकची एकाचवेळी वाहतूक; रस्ते अपघातात होणार घट 
• उद्योजक अन्‌ शेतकऱ्यांची सोय; प्रत्येक खेपला ठेकेदाराला मिळणार चार लाख रुपये 
• कोकण रेल्वेकडून भाडेतत्त्वावर घेतला मध्य रेल्वेने एक रेक 
• उदय पाटील यांनी घेतले कंत्राट; ट्रक मालकांनी सहभागी होण्याचे आवाहन 
• प्रदूषण कमी अन्‌ इंधन बचतीच्या दृष्टीने प्रयोग आहे महत्त्वाचा 

हेही नक्‍की वाचा : भूर्दंड सोसेना ! रेल्वेकडून पार्सल वाहतूक सुरु