Ashadhi Wari 2023 - चालू वर्षी आषाढी एकादशी व मुस्लिम समाजाचा बकरी ईद हे दोन्ही सण गुरुवार ता 29 रोजी एकाच दिवशी आल्याने त्या दिवशी कुर्बानी न देण्याचा मुस्लिम समाजाचा निर्णय झाला असल्याची माहिती मुस्लिम समाजातील सामाजिक कार्यकर्ते जिब्राईल शेख यांनी दिली.

मोहोळ पोलीस ठाण्याचे पोलीस निरीक्षक विनोद घुगे यांनी या दोन्ही सणाच्या पार्श्वभूमीवर शहरातील मुस्लिम समाजातील प्रमुखांची बैठक आयोजित केली होती. यावेळी शेख म्हणाले, मोहोळ शहरात हिंदू-मुस्लीम एकोपा कायम आहेच.

तो तसाच पुढे सुरू राहावा व एकमेकांच्या धार्मिक भावना दुखावू नयेत यासाठी आषाढी एकादशी दिवशी कुर्बानी न देण्याचा निर्णय घेतला असल्याचे सांगितले. आम्हाला कुर्बानी साठी तीन दिवस असतात. त्यापैकी गुरुवारी फक्त नमाज पठण करावयाचे शुक्रवार व शनिवार या दिवशी तो कार्यक्रम केला जाणार असल्याचे त्यांनी सांगितले.

जिल्ह्यात इतर ठिकाणीही मुस्लिम समाजाने अशा प्रकारचा निर्णय घेतला असल्याचे शेख यांनी सांगितले. यावेळी अशा प्रकारचा सकारात्मक निर्णय झाल्याने पोलीस निरीक्षक घुगे यांनी सर्वांचे आभार मानले. यावेळी समीर शेख, अल्ताफ शेख, रशीद पठाण, अशपाक मिर्झा, जुबेर शेख, मुजमेल हुंडेकरी, अनिस कुरेशी, रफिक हरणमारे, मुजीब शेख, आधी सह अन्य मुस्लिम बांधव उपस्थित होते.