पंढरपूर (सोलापूर) : वाळू चोरी करणाऱ्या लोकांवर कारवाई करण्यासाठी गेलेल्या महिला तहसीलदारांच्या आणि त्यांच्या पथकातील कर्मचाऱ्यांच्या अंगावर चारचाकी वाहन घालून, त्यांना दुखापत करून जिवाला धोका करण्याचा प्रयत्न झाला. पथकातील कर्मचाऱ्यास आरोपींनी शिवीगाळ केली. या प्रकरणी तहसीलदार डॉ. वैशाली वाघमारे यांनी दिलेल्या फिर्यादीवरून पोलिसांनी तिघांविरोधात गुन्हा दाखल केला आहे. 

हेही वाचा : पोलिस चौकात तैनात; मात्र शेवटच्या कडक लॉकडाउनचा उडतोय गल्लीबोळात बोजवारा 

या घटनेची पोलिसांकडून समजलेली माहिती अशी, की 21 जुलै रोजी येथील सांगोला जॅकवेलजवळील भीमा नदीच्या पात्रातून वाळूचा अवैध उपसा करून चोरी सुरू असल्याची माहिती तहसीलदार डॉ. वैशाली वाघमारे यांना मिळाली. त्यानंतर त्या तातडीने त्यांच्या पथकातील कर्मचाऱ्यांसह घटनास्थळी पोचल्या. चंद्रभागा नदीपात्रातून विनापरवाना वाळू उत्खनन करून बिगर क्रमांकाच्या पांढऱ्या रंगाच्या चारचाकी वाहनामधून वाळू घेऊन जात असल्याचे त्यांना दिसले. त्या वाळू चोरांना अडवण्याचा प्रयत्न तहसीलदार डॉ. वाघमारे आणि त्यांच्या पथकातील कर्मचाऱ्यांनी केला. तेव्हा आरोपी अण्णा पवार, ग्यानबा धोत्रे आणि भैय्या ऊर्फ प्रकाश गंगथडे यांनी शासकीय कामात अडथळा आणून तहसीलदार डॉ. वाघमारे आणि त्यांच्या सोबतच्या पथकातील कर्मचाऱ्यांच्या अंगावर वाहने घालून त्यांना दुखापत करण्याचा व जिवाला धोका होईल असे कृत्य करण्याचा प्रयत्न केला. पथकातील प्रशांत शिंदे यांना ढकलून देऊन दमदाटी केली. 

हेही वाचा : और हड्डी गले में फंस गई..! बोकडाच्या जेवणामुळे उघडकीस आली कैदी, पोलिस, गावकरी आणि कोरोनाची धक्कादायक कहाणी; वाचा सविस्तर... 

सुमारे तीन लाख रुपये किमतीच्या दोन पांढऱ्या रंगाच्या बिगर नंबरच्या चारचाकी वाहनांमधून शासनाच्या मालकीची सुमारे 12 हजार रुपये किमतीची गौण खनिज वाळू चोरून नेली. या प्रकरणी तहसीलदार डॉ. वाघमारे यांनी पंढरपूर शहर पोलिस ठाण्यात फिर्याद दाखल केली असून, वरिष्ठ पोलिस निरीक्षक अरुण पवार यांच्या मार्गदर्शनाखाली सहायक पोलिस निरीक्षक श्री. गायकवाड पुढील तपास करीत आहेत. 

संपादन : श्रीनिवास दुध्याल