द. सोलापूर ः सोलापूरचे दिवंगत ज्येष्ठ समाजवादी नेते प्र. गो. तथा बाबा कुसूरकर यांच्या जन्मशताब्दी वर्षानिमित्तच्या विशेषांकासाठी बाबांचे स्मृतीपर लेख, छायाचित्रे व आठवणी येत्या 10 नोव्हेंबरपर्यंत पाठवण्याचे आवाहन विशेषांक समितीच्या वतीने करण्यात आले आहे. 
सोलापूरच्या राजकीय, सामाजिक, उद्योग आणि कामगार क्षेत्रातील ज्येष्ठ समाजवादी नेते बाबा कुसुरकर यांचे यंदा जन्मशताब्दी वर्ष आहे. त्यानिमित्त नुकतीच एक बैठक झाली. या बैठकीत बाबा कुसुरकर यांच्या 23 व्या स्मृतीदिनानिमित्त आदरांजली वाहण्यात आली. यावेळी "कै. साथी बाबा कुसुरकर जन्मशताब्दी विशेषांक समिती'ची स्थापना करण्यात आली. ज्येष्ठ विचारवंत पन्नालाल सुराणा विशेषांकाचे प्रधान संपादक आहेत तर दत्ता गायकवाड कार्यकारी संपादक आहेत. संजीव कुसुरकर सचिव आहेत. या विशेषांकासाठी बाबांचे स्मृतीपर लेख, छायाचित्रे व आठवणी द्वारा- दत्ता गायकवाड, ऋतुचित्र,8371 रेल्वे लाईन्स, सोलापूर 423001 या पत्त्यावर तसेच 7588266710 व 9975626710 या भ्रमणध्वनीवर व्हॉटसऍपवर पाठवण्याचे आवाहन करण्यात आले आहे. या बैठकीत बाबांच्याविषयी बोलताना अनेकांनी मनोगत मांडले. सोलापूरचे जुनी गिरणी टाळेतोड आंदोलन, एन. जी. मिल सत्याग्रह, महापालिका कामगार युनियन, उजनी धरण बाधितांचे पुनर्वसन, सोलापूर पाणी समस्या, 1972 चा रेल्वे संप अशा अनेक आंदोलनात बाबांचा महत्त्वपूर्ण सहभाग होता. महाजन कमीशन समोर बाबांनी दिलेल्या अभ्यासपूर्ण साक्षीने सोलापूर महाराष्ट्र प्रांतात राहण्यासाठी आग्रही भूमिका मांडली गेली. बाबांनी होटगीरोड औद्योगिक वसाहतीच्या उभारणीत आणि जडणघडणीत निर्लोभ योगदान दिले असल्याचे मत यावेळी मांडण्यात आले. 

संपादन : अरविंद मोटे