सोलापूर - शहरात दोन दिवसांत दुसऱ्यांदा चेन स्नॅचिंगचा प्रकार घडला आहे. २० एप्रिलला शेळगी परिसरात अशीच घटना घडली होती. तत्पूर्वी, १८ मे रोजी प्रिती चिदानंद भावी (रा. हुमानबाद, जि. बिदर) यांच्या गळ्यातील दागिने दुचाकीवरून आलेल्या तरूणाने पळवून नेले आहे. भावी यांनी विजापूर नाका पोलिसांत फिर्याद दिली असून पोलिस चोरट्याचा शोध घेत आहेत.

चाटला साडी सेंटर ते शेळगीतील भीम नगर या रोडवर मंगल राजकुमार पांढरे यांच्या गळ्यातील २७ हजारांचे गंठण मागून आलेल्या दुचाकीस्वाराने हिसकावून नेले होते. २० एप्रिल रोजी ही घटना घडली होती. त्याचा तपास जोडभावी पेठ पोलिस अजूनही करीत आहेत. तेवढ्यातच दुसरी घटना घडली आहे. दरम्यान, प्रिती भावी या त्यांच्या मावस भावाच्या विवाहासाठी हुमानाबादहून सोलापुरात आल्या होत्या. जगदिश मंगल कार्यालयातून त्या मामाच्या मुलीच्या घरी जात होत्या. वसंत नगरातील गणपती मंदिरासमोर आल्यानंतर मागून आलेल्या दुचाकीस्वाराने अचानक त्यांच्या दुचाकीजवळ त्याची गाडी नेली आणि प्रिती भावी यांच्या गळ्यातील सोन्याचे गंठण ओढले. ३० हजार रुपयांचे गंठण चोरट्याने १८ एप्रिल रोजी सकाळी साडेदहाच्या सुमारास चोरून नेल्याचेही त्यांनी पोलिसांना सांगितले. पोलिस उपनिरीक्षक मुरकुटे तपास करीत आहेत.

महिलांमध्ये भीतीचे वातावरण

दुचाकीवरून घराकडे किंवा नातलगांकडे जाणाऱ्या महिलांच्या गळ्यातील दागिन्यांवर वॉच ठेवून अनोळखी दुचाकीस्वार चेन स्नॅचिंग करीत आहेत. त्यामध्ये दुचाकीवरून जाणारी महिला रस्त्यावर पडेल, तिच्या जीवाचे बरे वाईट होईल, याचा चोरटे काहीच विचार करीत नाहीत. तीन दिवसांत दोन घटना घडल्याने महिलांमध्ये भीतीचे वातावरण आहे. शहरातील बंद घरांमध्ये चोरी होते, सकाळी घर उघडे असलेल्या घरातील लॅपटॉप, मोबाइल चोरी होत आहेत.