पंढरपूर (सोलापूर) : परतीच्या पावसाने सोलापूर जिल्ह्यात हाहाकार उडाला आहे. पंढरपूर, सांगोला, माळशिरस तालु्क्यातील ओढे नाल्यांनाही पूर आला आहे. त्यातच उजनी धरणातून भीमानदी पात्रात 2 लाख 50 हजार तर वीर धरणातून नीरा नदीत 32 हजार क्युसेक पाणी सोडण्यात आले आहे. त्यामुळे पंढरपूर येथील चंद्रभागेमध्ये 1 लाख 82 हजार क्युसेक पाणी आले आहे. त्यामुळे चंद्रभागेला महापूर आला आहे.

2007 नंतर 13 वर्षांनी चंद्रभागेला महापूर आला आहे. पुराच्या पाण्यामुळे नदीकाठ लगत असलेल्या सुमारे सहा हजार कुटुंबे बाधीत झाली असून एक हजार नागरिकांना सुरक्षित स्थळी स्थलांतरीत केले आहे, अशी माहिती पंढरपूरचे प्रांताधिकारी सचिन ढोले यांनी दिली आहे.

हे ही वाचा : वेळापुरात पावसामुळे घरे-दुकानात पाणी, संसार उघड्यावर, शेतीचेही मोठे नुकसान

दरम्यान पूराच्या पाण्यामुळे पंढरपूर-,सातारा, पंढरपूर-पुणे, पंढरपूर-विजापूर, पंढरपूर-सोलापूर या मार्गावरील वाहतूक बंद केली आहे. आज दुपारपर्यंत चंद्रभागेत तीन लाख क्युसेक पाणी येण्याची शक्यता असल्याने एनडीआरएफची एक टीम दाखल झाली आहे. पंढरपूर शहरा लगतचा नवीन पूर आणि अहिल्यादेवी हे दोन्ही पूल वाहतूकीसाठी बंद केले आहेत. मागील चार ते पाच दिवसांपासून परतीच्या पावसाने धुमाकूळ घातला आहे.

हे ही वाचा : नरखेडचे 70 व डिकसळच्या 100 हून अधिक कुटुंबांचे तात्पूरते स्थलांतर

त्यातच उजनीतून पाणी सोडल्याने भीमानदीकाठच्या सुमारे 55 गावांना पूराचा धोका निर्माण झाला आहे. या सर्व गावांना जोडणारे मार्ग देखील बंद झाले आहेत. तेथील सर्व नागरिकांना प्रशासनाकडून सूचना देण्यात आल्या आहेत. पावसामुळे कासाळगंगा ओढयालाही पूर आला आहे. ओढ्याकाठच्या नागरिकांना देखील सुरक्षित स्थळी हालवण्यात आले आहे.

चंद्रभागेला आलेल्या पुरामुळे शहरातील व्यासनारायण झोपडपट्टी, आंबेडकर नगर, आंबाबाई पटांगण, लखुबाई मंदिर आदी सखल भागात पाणी शिरल्याने येथील सुमारे एक हजार नागरिकांचे सुरक्षित स्थळी स्थलांतरी केले आहे. नागरिकांनी घराबाहेर पडू नये, असे आवाहन ही प्रांताधिकारी सचिन ढोले यांनी केले आहे.
 

संपादन - सुस्मिता वडतिले