सोलापूर : मिळकत कराच्या थकबाकीपोटी देण्यात आलेले सुमारे सहा लाख रुपयांचे धनादेश "बाऊन्स' झाले आहेत. संबंधित मिळकतदारांना धनादेशावरील रक्कम दंडासह भरण्याची नोटीस बजावण्यात आली असून, ती मुदतीत न भरल्यास त्यांच्या विरोधात पोलिस कारवाई केली जाणार आहे.

 हे आधी वाचा - घरच्या रखवालदारावर होणार कारवाई

17 धनादेश बाऊन्स
या प्रकरणी संबंधित मिळकतदाराविरुद्ध पोलिस कारवाई केली तर न्यायालयाच्या फेऱ्या माराव्या लागतील या भीतीने कारवाई करण्यास अधिकारी धजावत नसल्याचे दिसून येत आहे. मात्र, त्यामुळे आजच्या घडीला जमा असलेल्या धनादेशापैकी जवळपास 17 धनादेश "बाऊन्स' झालेले आहेत. मात्र, तरीही संबंधितांविरुद्ध कारवाई केली नाही. या संदर्भात "ई-सकाळ'वर बातमी प्रसिद्ध झाल्यावर कर संकलन विभागाने तातडीने अशा मिळकतदारांची यादी तयार केली असून, संबंधितांना पैसे भरण्याची नोटीस पाठवली आहे. 

हेही वाचा - अखेर बनावट सही प्रकरणातील मक्तेदारावर गु्न्हा

विशेष वसुली मोहिम सुरु 
सध्या महापालिकेची मिळकत कर थकबाकी वसुलीची मोहीम सुरू आहे. थकबाकीपोटी नळजोड तोडणे, जंगम मालमत्ता जप्त करणे आणि प्रसंगी पोलिस कारवाई करणे अशा पद्धतीने कारवाई केली जात आहे. कारवाईच्या भीतीने अनेक मिळकतदार खात्यावर पुरेशी रक्कम नसतानाही धनादेश देतात आणि वेळ मारून नेतात. सुटका झाल्याचे मिळकतदाराला तर वसुली झाल्याची कर्मचाऱ्याला समाधान वाटते. मात्र जमा झालेले धनादेश हे केवळ कार्यालयात शिलकेत पडू लागले आहेत, अशी स्थिती आहे. 

पाच नळजोड तोडले 
मिळकत कराच्या थकबाकीपोटी बुधवारी विडी घरकूल परिसरातील पाच नळजोड तोडण्यात आले. दिवसभरात एकूण दोन लाख सहा हजार 150 रुपयांची वसुली करण्यात आली. दोन लाख रुपयांपेक्षा जास्त थकबाकी असलेल्या मिळकतदारांची यादी तयार करण्यात आली आहे. त्यांच्या नावाचे डिजिटल फलक तयार झाले असून, ते संबंधित भागात लावण्यात येणार आहेत.