केतूर (सोलापूर)ः गणरायाचे आगमन शनिवार (ता. 22) रोजी होत आहे मात्र देशभर पसरलेल्या कोरोना महामारीच्या संकटामुळे दरवर्षी दिसणारा गणेश आगमनाचा उत्साह मात्र यावर्षी कमी प्रमाणात दिसून येत आहे. गणरायाच्या आगमनापूर्वी बाजारपेठेतील उलाढालही मंदावली आहे. यावर्षी गणेशोत्सव जवळ येऊन ठेपला असतानाही परवाना काढण्यासाठी सार्वजनिक गणेशोत्सव मंडळ पदाधिकाऱ्यांची गर्दी दिसत नाही. 

हेही वाचाः गणेशोत्सवासाठी मंडळांच्या पदाधिकाऱ्यांना दिले पोलिस आयुक्तांनी हे निर्देश 

कोरोना महामारीच्या संकटामुळे सर्वच उत्सव व सणावर पाणी फेरले गेले आहे.त्यात गणेशोत्सवही अपवाद राहिलेला नाही.देशात व राज्यात कोरोनाचे रुग्ण वाढत असल्याने याचे सावट गणेशोत्सवरही दिसून येत आहे. 

हेही वाचाः प्रशासन हतबल ! ग्रामीणमध्ये कोरोना सुसाट ; आज 258 पॉझिटिव्ह अन आठ मृत्यू 

सार्वजनिक गणेशोत्सव मंडळांचा शासनाच्या आदेशाप्रमाणे मोठ्या गणेशमूर्ती खरेदी करण्याकडे कल नसल्याने मूर्तिकार ही संकटात सापडले आहेत.तसेच यावर्षी सामाजिक देखावे, आकर्षक विद्युत रोषणाई, हलते देखावे यांनाही "ब्रेक" बसला आहे. 
करमाळा तालुक्‍यात दरवर्षी गणेशोत्सव मंडळांची गणेशोत्सवासाठी लागणारे परवाने काढण्यासाठी अक्षरशः झुंबड उडत असे त्यामुळे शासनाकडे महसूलही जमा होत असे. यावर्षी गणेशोत्सव 2/3 दिवसावर येऊन ठेपला असतानाही परवाना काढण्यासाठी सर्वजनिक गणेशोत्सव मंडळ पदाधिकाऱ्यांची गर्दी दिसत नाही. एकूणच परवान्यासाठी गणेशोत्सव मंडळाचा प्रतिसाद अत्यल्प आहे.आज अखेर पर्यंत तालुक्‍याच्या ग्रामीण भागातील फक्त एकाच सार्वजनिक गणेशोत्सव मंडळाने परवान्यासाठी अर्ज दिल्याचे समजत आहे.यावर्षी अतिशय साध्या पद्धतीने गणेशोत्सव साजरा करण्यावर मंडळाचा भर असल्याने परवान्यासाठी गर्दी कमी असल्याची दिसन आहे.एकूणच परिस्थिती पाहता शहरासह ग्रामीण भागातही सार्वजनिक गणेशोत्सव मंडळाचे पदाधिकारी गणेशोत्सव करण्याच्या मानसिक स्थितीत नसल्याचेच दिसून येत आहे. 
 
संपादनः प्रकाश सनपूरकर